Сооктар дүшкени-биле Тывада бажың өрттериниң саны көвүдээн. Тываның Баштыңының Аппарат хуралынга, ОБЯ-ның регионалдыг эргелелиниң медеглээни болза, эрткен неделяда республикага 23 бажың өртү болган. Бир кижи аңаа чок болган, бир кижиниң амы-тынын камгалаан.
Тываның девискээринге 2024 чылдың эгезинден бээр 389 бажың өртү болган, ооң мурнунда чылга деңнээрге, 15 хуу хөй. Аңаа 13 кижи чок болган, 44 кижи кемдеп-берттинген.
Печка одаар хуу бажыңнарда өрттер хөй таваржып турарын специалистер демдеглээн. Шупту өрттерниң 67,4 хуузу от-биле оваарымча чок болганындан үнгени – кол чылдагаан. Оон аңгыда, бажыңнарда одаар печкалар— угарлыг ыштан аар хораннаныышкынның үнер дөзү ол. ТР-ниң Кадык камгалал яамызының медээзинден алырга, бо чылын республикага 24 кижи угаарлап чок болган, оларның аразында 3 бичии уруг бар (2023 ч. – 31, оларның 9-у - уруглар).
Токсикология эмнелгезинче угарлыг ыштан хораннанган 62 кижи кирген. Хораннанган 20 кижини эмнелгеге чыттырар кылдыр чоруткан.
Тываның Баштыңы Владислав Ховалыг социал албаннар таварыштыр автономнуг өрт медээчилери салыр адрестиг ажылды уламчылаарын ТР-ниң Күш-ажыл яамызынга дааскан. Хөй ажы-төлдүг болгаш социал айыылдыг байдалда өг-бүлелерде ооң мурнунда салган өрт медээчилериниң ажылын база катап хынаар.
2018 чылдан бээр Тывада социал албанның онза кичээнгейи херек өг-бүлелерниң бажыңнарынга автономнуг медээчилерни салып эгелээн. Республика бюджединден акша-хөреңги-биле ажылды чорудуп турган. 2024 чылга чедир 2612 медээчини салган. А 2024 чылда социал төптерниң учедунда өг-бүлелерниң 1,3 муң бажыңынга өрт медээчилерин салган. Чыл төнчүзүнге чедир ам-даа 135 өрегеге ону эптеп салыр.
ТР-ниң Чазааның парлалга албаны.
“Шын” №97 2024 чылдың декабрь 18