Эрткен хүннерде Москвага “Космос” деп Улуг концерт залынга IV Бүгү-россия чергелиг “Россияның сагыш-сеткили” деп улусчу чогаадылга уран чүүлүнүң коллективтериниң аразынга мөөрей болуп эрткен. Аңаа Эрзин кожуундан ийи коллектив: ТР-ниң алдарлыг хөөмейжизи Аян Кыргыстың удуртканы “Эзир-Уя” улустуң аас чогаалының ансамбли, ТР-ниң уран чүүлүнүң алдарлыг ажылдакчызы Аяна Монгуштуң удуртканы “Эрзин” ыры болгаш сам ансамбли киришкеш, кайызы-даа чедиишкинниг болган.
Мөөрейниң түңнелинде «Фольклор» деп номинацияга “Эзир-Уя” ансамбль I чергениң лауреаттары атка төлептиг болганнар. “Эрзин” ыры болгаш сам ансамбли “Москваның Кубогу. Россияның өндүрү” фестиваль-мөөрейниң “Вокал уран чүүлү” номинацияга тиилээш, I-ги чергениң лауреады атты чаалап алган.
Эрзин кожууннуң бо ийи коллективиниң чедиишкиннери дээрге улусчу чогаадыкчы уран чүүлдү, тыва чоннуң культурлуг өнчүзүн, чаңчылдарын сайзырадыры болгаш кадагалап арттырарынга улуг үлүг-хуузун киирип турарының бадыткалы деп, ТР-ниң Культура яамызы үнелээн. Эрзинчилер, эр хейлер!
Бистиң корр.
Медээни болгаш чурукту ТР-ниң Культура яамызындан алган.
“Шын” №86 2024 чылдың ноябрь 9