Тывада бо чайын ажылдаар 5 эштир чер албан езузунуң чөпшээрелин алган. Июнь 3-те болуп эрткен республика Чазааның Аппарат хуралынга ону дыңнаткан.
Оларның ийизи уругларның дыштанылга лагерьлери – Мөңгүн-Тайга кожууннуң Ак-Хөлде база Таңды кожууннуң Чагытай хөлде. Чагытай хөлдүң соңгу кезээнде, чоннуң Алдын элезиннер деп адаары черде турисчи баазалар чоогунга эштир пляж ажыттынар.
Оон аңгыда, Тожу кожуунда Азас хөлде шак-ла ындыг турисчи баазада, ол ышкаш республика найысылалы — Кызыл хоорайда культура болгаш дыштанылга парыгында, Улуг-Хемниң адырында эштир черлер албан езузу-биле ажылдаар.
Тываның Баштыңы Владислав Ховалыг эштир кылдыр дериттинген черлерни тургузар дээн тус чер чагыргаларының бот-идепкейин деткээн. Улуг-даа, бичии-даа улуска айыыл чок эштир байдалдарны тургусканындан база мергежилдиг камгалакчылар постуларын ажылдатканындан, шак ындыг эштир черлерге дыштанып келгеннерден сугга дүшкен деп чаңгыс-даа таварылга бүрүткеттинмээнин ол чугаалаан.
Сугга хай-халап статистиказы база ону көргүскен. 2023 чылда хоруглуг черлерге эштип тургаш 23 кижи амы-тынындан чарылган, оларның санында үш чаш ада-иезиниң хайгааралы чок тургаш чок болган. Мөчээн кижилерниң 16-зы эзирик турганы билдинген.
Тываның Баштыңы эштиринге чөпшээрээн черлер чогуур негелделерге дүүшкен турарын сагындырган. Эштир чер зоназының суун, сай-довураан, айыылдыг черлер бар-чогун хынап, эрик чоогунда оът-сигенин кезип, айыыл-халапты болдурбазының база бирги дуза чедирилгезиниң дугайында стендилерни тургузуп, быжыглаар.
Эштир черлер организастаарының албан кылыр негелдези – камгалал постуларны доктаамал ажылдадыр, ол ышкаш суг кырынга эштир зонаның кызыгаарын айыткан медээ демдектерин херер. Тус чер чагыргалары дериттинген эштир черлер ажыдар аргалары чок болза, камгалакчыларның көжүп чоруур постулары-биле “черлик пляжтар” деп адаар черлерни контрольдаарын чедип алыр ужурлуг.
ТР-ниң Чазааның парлалга албаны.
«Шын» №41 2024 чылдың июнь 5