Евгения Гулик: "Хоозун чулчуруушкун дээр мен".

Тускай шериг операциязы, долу эвес мобилизацияга хамаарышкан хөй-ле хоозун-меге медээлер, "дидир-дидирлер" социал четкилерде, чон ортузунда тарап нептереп турары чажыт эвес. Ооң-биле чергелештир чурт иштинде байдалды дүшкүүредип, чоннар аразында найыралды кошкадыр дээн оралдажыышкыннар көвүдээнин эскерип болур.

Бо байдалга боттарының хууда бодал-көрүжүн Тывада чурттап турар янзы-бүрү омак-сөөктүг улус илередип турар. Оларның бирээзи - Евгения Гулик:

- 2022 чылдың сентябрь ай хөй-ле чүүлдерже көрүштү өскертип, кижилерниң амыдыралын, салым-чолун эде кылыпты. Ынчалза-даа өскерилге чок арткан чаңгыс чүүлдү билир силер бе? Бок-тур...

Бок аңгы-аңгы болгулаар, а эң-не коргунчуу - ИНФОРМАСТЫГ!!!

Бо үеде азыг бүрүзүнден: “диван критиктериниң” бодалдары, байдалды анализтээн “бажың политологтары” , “ааспырак чалчыраашпайларның” баш удур бодаан чугаалары кижини билбээчеңнеп эрттирер арга чок болдуруптар апарды. Канчаарга-даа, бо анчыг медээлер агымынга кижи алзыптар чыгыы-дыр.

Мени нациялар ылгажырынга хамаарышкан агым таварыпты.
Тывада орустарны кызып эгелээн деп бир-ле форумдан номчудум...

Ол дээрге хоозун-меге чулчуруушкун-дур!

Фейк арыннар болгаш бодал чок комментаторларның дузазы-биле ол мугулай чугаа кончуг дүрген интернет четкилеринде тарап тур.
Бодум Кызылда 10 ажыг чыл чурттап турар мен. Чер-черлерде үүрмек чөрүлдээлер кайда-даа бар, ынчалза-даа омак-сөөк ылгашкан улуг хемчээлдиг чөрүлдээлер черле көрбээн мен, азы караам шийип алган кылаштап турар кижи боор мен бе? Чоннар аразында аас-дыл, шош-содаа үндүрүксээш, ону өштүү-биле тарадып, маргышкан улусту хыы ханып, хайгаараан улус, хаван малгашты кайыын-да тып аар дээн үлегер домакта дег...

КҮЖҮР ЧОНУМ!!!
Бис боттарывыс чүнү көрүксеп, дыңнаксап турар бис, ону бодувус долгандыр чыып аап турар болур бис. Дыңнап, хүлээп ап турар медээлериңерни эки шүүреп, шүгдүнүңер! Кара-багай бодалдарга алыспайн, чаагай сеткил-биле чүректеривис долдураалыңар!