Тываның даш чонукчуларының эвилелиниң даргазынга соңгуткан.
Шак ындыг шиитпирни Чаа чыл бүдүүзүнде Тываның даш чонукчуларының аразынга болган 2024 чылдың эң дээре даш чонукчузун илереткен мөөрей соонда хоочун даш чонукчуларының сүмелээни ёзугаар үндүрген.
Ай-Демир Далаевич Шыырап Кызылдың немелде өөредилге төвүнде уран чүүл угланыышкынныг башкылаашкын ажылын чорудуп турар. Ол “Сарыг-Хая” чогаадыкчы каттыжыышкынны удуртпушаан, Кызылдың сургуулдарынга даш чонарының аргаларын өөредип турар.
2024 чылдың эң дээре даш чонукчузун илереткен мөөрейге дыка хөй ажылдарны мастерлер делгеп көргүскен. Оларның аразында солун сюжеттиг болгаш даш чонарының аңгы-аңгы аргаларын ажыглаан ажылдарны жюри үнелеп көрген. Чонар-даштан кылган ажылдарны чыып чоруур хууда коллекционер Хээлиг Тулушту республиканың даш чонукчулары эки билир. Ол бодунуң чыып алган солун ажылдарын мөөрейден дашкаар база делгээн. Тываның сураглыг даш чонукчулары ол делгелгеден боттарының кажан-бир шагда кылган ажылдарын катап көрүп, хууда коллекционерге өөрүп четтиргенин илереткеннер.
Болган мөөрейниң түңнелинде 2024 чылдың эң дээре даш чонукчуларын илереткен:
– Билдингир даш чонукчузу Алексей Кагай-оол “Өг-бүле” деп ажылы-биле тиилекчи болган. Ай-Демир Шыырап “Арт кырынга дыштанылга” деп ажылы-биле 2-ги черни ээлээн. Кара-оол Бичелдейниң “Тыва шыдыраа” деп ажылы 3-кү черге төлептиг болган.
“Ёзу-чаңчылды кадагалап арттырганы дээш” деп тускай шаңналды Танаа-Херел Хунанга тывыскан. Ооң “Хуна” деп ажылынга жюри ындыг үнелелди берген.
Аныяк даш чонукчуларының аразынга Эрес Лопсанның “Тоолчургу Тыва” деп ажылы тиилээн.
Мөөрей соонда Тываның даш чонукчуларының эвилелин баштаары-биле соңгуткан чаа даргазынга чыылганнар байыр чедирип, чедиишкинниг ажылдаарын күзээн.
Сөөлгү үш чыл республикага даш чонар уран чүүлдү катап хөгжүдеринге болгаш аңаа сонуургалды оттурарынга чугула чылдар болганын чыылганнар демдеглээннер: ол үе дургузунда школачылар база дуржулгалыг даш чонукчуларының аразынга чогаадыкчы эвээш эвес мөөрейлер эрткилээн; Тывага даш чонар уран чүүлдүң хөгжүлдезиниң дугайында айтырыгны сайгарган “төгерик ширээлер” каш-даа удаа болгулаан; Тываның Парламентизи Даш чонукчузунуң хүнүн тургузарын деткээн болгаш ол уран чүүлдүң тергииннеринге алдарлыг ат тыпсырын тургусканын база сагындыраалы.
К. МОНГУШ белеткээн.
Медээ болгаш чурукту ТР-ниң Культура яамызындан алган.
«Шын» №1 2025 чылдың январь 16