Тывада Россияның Армиязының культура хүннеринге тураскааткан янзы-бүрү хемчеглер эртип турар. Оларның бирээзи сентябрь 17-де В. Көк-оол аттыг Национал хөгжүм-шии театрының музейинге солун мастер-класс болган.
Аңаа Россияның Армиязының Төп академиктиг театрының аныяк артизи Александр Макаров шии үезинде актер кижи көргүзүгден монологче шилчиир балансты канчаар шын тудуп билирин тыва театрның артистеринге көргүскен.
Мастер-класс үезинде Россияның Армиязының Төп академиктиг театрының директорунуң оралакчызы Эдуард Павлов база киришкен. Ол театрның сцена кырының техниктиг аргаларының дугайында чугаалаан. Ону тыва театрның артистери улуг сонуургал-биле дыңнаан. Солун чүве чүл дээрге, Армияның Төп академиктиг театрының сценазы Европада эң-не улуг сцена болуп турар. Чүгле көрүкчү залында 1500 олуттуг. Оон аңгыда сцена бир дөрбелчин метрге 90 тоннаны ууптар, элээн каш взводту болгаш танк, автомашиналар дээн ышкаш аар шериг техниканы база сценаже үндүрүптер аргалыг.
Ол эксперименталдыг сценаны боттандырарынга Россияның камгалал сайыды, Армияның генералы Сергей Шойгунуң киржилгези улуг болганы билдингир. Сураглыг чаңгыс чер чурттуувус Россияның Армиязының театрының чогаадыкчы коллективи-биле ужурашкаш, аныяк режиссерлар-биле кады ажылдажылга чорударынче кичээнгей салырын сүмелээн дээрзин тыва театрның артистери келген аалчылардан билип алган.
Армияның Төп академиктиг театрының эксперименталдыг сценазынга тургускан “Метод Гронхольма” деп шиизин ол хүн көрүкчүлер тыва театрга көөр аргалыг болган.
В. Көк-оол аттыг Национал театрның медээзи-биле К. МОНГУШ белеткээн.
“Шын” №71 2023 чылдың сентябрь 20