Койгуннар биле пагалар
Койгуннар бир-ле хүн аянга чыглып кээп, олардан кортук амытаннар чок деп чүвени медереп билгештиң, хары угда шупту сугга дүжүп өлү бээр дээштиң, бир ээтпекке келгеннер. Оларның кылажының сөдүртүнчек даажын дыңнаан пагалар хөөлбектиң эң ханызынче шымны бергеннер. Улуг койгун ону эскере тыртып кааш: “Көрүңер даан, бистен-даа кортукпайлар бар-дыр, ам муңгарап-деңгереп-даа канчаар бис” деп өөрүп алгырган иргин.
Чамдык кижилер өскелерниң качыгдалын көргеш, бодунуң човалаңын чазамыктап алыр болгулаар.
Пагалар
Чурттап турганы тулаазы соглу бээр орта, ийи пага сүмелешкеш, чаа турлаг дилеп салчыпканнар. Ынчап чорааш, бир кудукка кээп доктааганнар. Бирээзи тургаш, боданмайн-даа: “Боже шурай берээли” деп санал киирген. Өскези аңаа удурланып: “Чурттай-ла берген дижик бис. Кудуктуң суу соглу берзе, оон канчап үнер бис, эш?” диген.
Бодал чокка эстедип чоруурларны бо басня кичээндирип турар.
/ Меңги ООРЖАК очулдурган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn