Кадай биле дагаа
Бир дулгуяк кадайның дагаазы хүннүң-не чаңгыс чуурга төрүүр турган. Эки чемгерер болзумза, дагаам хүнде-ле ийини чуургалаар апаар чадавас деп бодап келгеш, кадай-даа оозун өй-хемчээл чокка чемгерип эгелээн. Ынчаар орта, дагаажыгаш эрттир семирээш, төрүвестей берген.
Чамдык улус хөй орулга алыр деп чазыйлааш, бодунда бар чүүлдерни чидирип алыр.
Огородчу
Огородчу ногааларын суггарып, кидин түлүк ажылдап турда, бир кижи келгеш айтырган: «Бок үнүштер чүге кадык-шыырак, а тарымалдары чүге кошкак, суларгай болур ирги?» Аңаа огородчу мынчаар харыылаан дээр: «Чүге дизе бок үнүштерге чер — ие, а өскелерге — соңгу ие».
Ынчангаш ада-иелиг ажы-төлден соңгу-башкы ада-иениң ажы-төлү аңгы болур ужуру-даа ол.
Тараачын болгаш ооң оолдары
Тараачын назылап кырааш, бодунуң оолдарын тергиин ажылчыннар кылып каар деп бодай берген. Бир хүн оларын кый деп алгаш чугаалап-тыр: «Оолдарым, бо виноград дөстериниң кайы бирээзиниң дөзүнде эртинелер хөөп каан мен. Ол шагда-шагда болган чүве-дир ийин, уткан-дыр мен».
Ашак бурганнай бээри билек, оолдары хүүректерин туткулапкаш, ол чоок-кавыны кижи базар чер чок кылдыр коптарып каапканнар. Чалгаа эрлер чүнү-даа тыппайн чангылап келзе-даа, чымчаттынган виноград дөстери кажангызындан-даа хөй дүжүттү хайырлаан дижир.
Басняда чугаалап турары дег, күш-ажыл — алдын шыгжамыр-дыр.
/ Меңги ООРЖАК очулдурган.
Чурукту ГигаЧатка чураан
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...