"Фермадан баартакка чедир”

Тывада тус черниң бараан бүдүрүкчүлерин деткиири-биле, “Фермадан баартакка чедир” деп чаа губернатор төлевилелин ажылдап кылыр болган.

“Чаңгыс демниг Россия” партияның Чиңгине чөвүлелиниң кежигүнү болгаш Күрүне Думазында регионалдыг политика болгаш тус чер бот-башкарылгазының талазы-биле комитеттиң бирги оралакчызы, “Бодуңнуун шилип ал” деп федералдыг төлевилелдиң координатору Сергей Морозов видео-харылзаа таварыштыр партийжи төлевилелдиң регионда хөй-ниити чөвүлелиниң кежигүннери-биле кады 44-кү Федералдыг Хоойлуже өскерилгелерни сайгарып чугаалашкан.

Чурттуң эрге-чагыргалары күрүне садып алыышкыннарының дугайында хоойлужудулгаже өскерилгелер киирерин саналдавышаан хевээр, ук хоойлужудулгаже өскерилгелерни рынокта байдалга дүүштүрген. Морозов бодунуң регионалдыг коллегаларынга бо талазы-биле сөөлгү медээлерни таныштырган, ылаңгыя национал чурумнуң дүрүмнеринге, күрүнениң камгалал чагыгларының болгаш эм-таң садып алыышкынының дугайында чугаалап берген. Ол ышкаш үлетпүр ипотеказы дээн чижектиг бизнести деткиириниң чаа хемчеглериниң дугайында видео-харылзааның киржикчилеринге тайылбырлап берген. Чаа чээлини бүдүрүлге объектилерин садып алырынга, тударынга азы чаартырынга, ол ышкаш үндезини-биле септеп-селииринге ап болур дээрзин С. Морозов тайылбырлаан.

Монополияга удур федералдыг албанның регионалдыг эргелелиниң удуртукчузу Феликс Хаджиев Тыва Республикада улуг үүрмек садыг компанияларының баартактарынга тус черниң бараан бүдүрүкчүлериниң барааннарынга черни үндүрүп бээриниң дугайында илеткелди кылган. Бо талазы-биле бодунуң санал-оналдарын Тывада улуг бүдүрүкчү- лер — республиканың социал-экономиктиг хөгжүлдезиниң амы-хууда программазының киржикчилери чугаалааннар.
ТР-ниң экономиктиг хөгжүлде болгаш үлетпүр сайыды Айдыс Сат комплекстиг ажылды чорударын – көдээниң бараан бүдүрүкчүлеринге дузалажып, бараанның бүдүрүкчүден төнчү садып алыкчыга чедир оруун кооперативтер дузазы-биле хевирлеп, ол ышкаш онлайн-капсырылганы тургузарын, шак ынчалдыр садып алыкчыларга бараанны харылзаштырыкчылар чокка чедирерин саналдаан.

«Россияның чөленгиижиниң» Тывада регионалдыг салбырының PR болгаш маркетинг талазы-биле комитединиң удуртукчузу Айлана Сүдер-оол барааннарның рынокка шимчеп сайгарлырынга тус черниң барааннарын имнеп-демдектээриниң тоң чугулазын чугаалаан.
Ужуражылганың түңнели — “Бодуңнуун шилип ал” деп федералдыг төлевилелдиң регионалдыг координаторларының база республиканың Көдээ ажыл-агый болгаш аъш-чем яамызының кады күжениишкининиң ачызында “Фермадан баартакка чедир” деп чаа губернатор төлевилелин ажылдап кылыр болган. Оон аңгыда, чугаалажыышкынның үезинде айыттынган сорулгаларны боттандырары-биле, партияның болгаш республика Чазааның аразында дугуржулганы чарарын саналдаан.

Чоокта чаа Тывага ажылдап эгелей берген “Бодуңнуун шилип ал” деп федералдыг төлевилел тус черниң сайгарлыкчыларын камгалаар болгаш деткиир, бодун долгандыр хөй-ниити организацияларын, саарылгага хамаарышпас организацияларны, күүсекчи эрге-чагырганың төлээлерин болгаш идепкейлиг хамаатыларны эвилелдээр сорулгалыг.

/А.ХЕРТЕК белеткээн.

"Шын" №25 2023 чылдың апрель 8

#Шынсолун #ТываРеспублика #ЧаңгысДемнигРоссия #Тыва #Фермаданбаартаккачедир