Фронтучу 97 харлаан

Ада-чурттуң Улуг дайынының киржикчизи, немец фашизмни чылча шаварынга улуг үлүүн киирип, эрес-дидим тулчуп чораан фронтучу Георгий Абросимовтуң бажыңынга Тываның Баштыңы Владислав Ховалыг биле ТР-ниң Дээди Хуралының Даргазы Каң-оол Даваа барып, Георгий Васильевичиниң 97 харлааны-биле холбаштыр дайынның болгаш күш-ажылдың хоочунунга изиг байырны Тываның хөй национал чонунуң өмүнээзинден, боттарының мурнундан чедирип, кадыкшылды, омак-сергек болурун, ам-даа узун назын чурттаарын күзээннер.

Георгий Васильевич Абросимов тараалаң Таңды кожуун чурттуг. Хөй ажы-төлдүг өг-бүлеге төрүттүнген, күш-ажылга чажындан-на чаңчыккан болгаш, орус тараачынның кандыг-даа ажылын ол кылып чораан. Черге ынакшыл, чаагай дүжүттү тарып өстүрери – хоочуннуң ханында. Назы-хары 100 чоокшулаан-даа болза, бажыңының чанында огородка ногаа аймаан тарып өстүрүп, аңаа ажылдаарынга ынак.

1941–1945 чылдарның өлүм-чидимниг дайынындан бүдүн-бүрүн дириг чанып кээр салым-чолдуг болган аныяк оол өскен-төрээн чурту Таңды кожууннуң, Тыва Республиканың хөгжүлдезинге улуг күш-ажылчы үлүг-хуузун киирген. Хоочуннуң хөрээнде дайынчы болгаш күш-ажылчы орден-медаль чайнап чоруур.

Георгий Васильевич Абросимов эрес-маадыр, ажыл-ишчи улуг салгалдың төлээзи. Ооң дайынчы болгаш күш-ажылчы оруу амгы салгалдың аныяктарынга төлептиг үлегер-чижек деп, Тываның Баштыңы Владислав Ховалыг демдеглээн.

/ Шаңгыр-оол МОҢГУШ белеткээн.
Буян ООржактын тырттырган чуруктары.

"Шын" №29 2023 чылдың апрель 22