ТР-ниң Арбитраж судунуң ажылдакчылары сураглыг фронтучу Галина Доваадорнуң (Кыргыс Сынаа) төрээн чери – Эрзин кожууннуң Булуң-Бажынга четкен.
Суд ажылдакчылары А.А. Доваадор, В.Э. Ооржак биле А.П. Окунев Ада-чурттуң Улуг дайынының киржикчизи Г.Т. Доваадорнуң тураскаалынга чечектерни салып, маадырның чырык адын сактыр ёзулалга киришкен.
Улуг Тиилелгениң 80 чыл оюнуң бүдүүзүнде тыва эки турачы Галина Тоңмитовнаның уйнуу, ТР-ниң Арбитраж судунуң суд хуралының секретары Айна Доваадор школачыларга «Эрес-дидим чоруктуң кичээлин» эрттирген.
Фронтучунуң уйнуу ооң кырган-авазы кожууннуң аът чарыжынга беш дакпыр чемпиону болурундан аңгыда, шериг санинструктору турганын чугаалаан. Галина Доваадор Ровно, Дубно хоорайларның болгаш Деражно, Погорельцы болгаш Сурмичи суурларның хостаашкынынга киржип турган хөй санныг совет солдаттарның амы-тынын камгалаан.
Булуң-бажыжылар маадыр фронтучунуң чырык овур-хевирин болгаш ооң дайын үезинде эрес-дидим чоруун сактып, утпайн чоруурун аалчылар онзалап демдеглээн. Эки турачының ады-биле сумунуң кудумчузун адааны – хүндүткелдиң болгаш сактыышкынның демдээ. Школачылар Ада-чурттуң Улуг дайынының киржикчилери – чаңгыс чер чурттугларын эки билир болгаш аңгы-аңгы хемчеглерде киржип турар.
Кичээл соонда суд ажылдакчылары школаның музейинге четкен. Ында Ада-чурттуң Улуг дайынының киржикчилериниң болгаш эки турачыларның дугайында төөгү материалдарын хумагалыы-биле шыгжаан Маадырларның ады кезээ мөңгеде дириг артар.
ТМГ Медээлеринден.
“Шын” №17 2025 чылдың май 8