Өг-бүлеге ажыктыг дыштанылга

Дыштанылга үезинде школачы уругларыныӊ телефонда чүнү көрүп, кандыг оюннар ойнап турарын хайгаараарын уттуп болбас дээрзин өөредилге албан черлери сагындырып турар.

Телефон, компьютер, гаджеттер ажыглаар чаӊчылын түр када соксадыр, угаан-медерелин дыштандырар сорулгалыг тускай угланыышкын 2012 чылда тыптып келген.

Ону «Цифровой детокс» (Дижитал детокс) деп адап турар. Ол дээрге кезек үеде интернет көөрүнден, чурагайлыг технологиялар ажыглаарындан бодунуӊ күзели-биле ойталаары-дыр.

Өг-бүле болгаш кижи бүрүзү интернет ажыглавас, гаджеттен дыштаныр хүн кылып алыры кончуг ажыктыг. Чүге дизе угаан-медерелди дышкарып, сагыш-сеткилди оожургадып, ажыктыг чүүлдерни кылып алырынга бо үелер дыка эптиг.

Дыштанылгада уруглары-биле кады ном номчуурун, угаан сайзырадыр оюннар ойнаарын, компьютер көрбейн, арыг черге агаарлаарын, шии-концерт көөрүн, спортчу оюннар ойнаарын сүмелеп турар.

Чурукту интернет четкизинден хоолгалаан.