Республиканың Баштыңы Владислав Ховалыг Москва хоорайга албан аайы-биле чорааш, Россияның энергетика сайыды Сергей Цивилев-биле ужурашкан. Ийи тала регионнуң энергетика комплекизин хөгжүдер кол угланыышкыннарны, электри болгаш чылыг хандырылга адырында төлевилелдерни чугаалашкан.
«Тываның энергетика комплекизин хөгжүдер кол угланыышкыннарны сайгарып көрдүвүс. Ылаңгыя республиканың чырык хандырылгазының четки комплекизиниң идегелдиин бедидер программаны ажылдап кылгаш, дугуржур чугула базымнарны кончуг таптыг сайгардывыс – деп, Владислав Ховалыг бодунуң блогунда дыңнаткан. – Электри күчү-күжүнге республиканың улгаткан хереглелин хандырарынче онза кичээнгейни салдывыс. Тывада чуртталга тудуу дүрген хөгжээнинден база инфраструктура сайзыраанындан чырык ажыглалынга хереглел чылда 9 хуу ажыр өскен. Ол айтырыгны шиитпирлээринге 2027 чылга чедир ажыглалче кирер чаа ЛЭП-ти тудар дугайында шиитпир хүлээп алдынган. Алдынган ол хемчеглер 2030 чылга чедир чырык күчүзүнүң чедишпес айтырыын бүрүнү-биле шиитпирлээр» – деп, ол айыткан.
Оон аңгыда чырык энергиязының магадылалдыг хандырылгазын тодарадыр база Кызылда агаар хирлендирер бүдүмелдер үндүрерин эвээжедир комплекстиг планны ажылдап кылырынга конкурс айтырыглары хүн чурумунче кирген.
«Бөгүн Тываның энергетиказын турум хөгжүдеринге дыка чугула эгелээшкиннерни чугаалаштывыс. Баш бурунгаар билдинген чедишпес чүүлдерни үезинде чайладырынга херек деткимчени көргүзеринге белен бис» — деп, Сергей Цивилев демдеглээн.
Президент Владимир Путинниң даалгазы-биле, 2021 чылдың декабрьда РФ-тиң Чазааның бадылааны Инвестиция төлевилелдериниң энергия хандырылгазының комплекстиг планы Тываның энергетика системазын амгы үеде эде чаартырының үндезини болганын сагындыраал. Бо чылын элээн каш объектилерни, ооң иштинде чырык дамчыдылгазының чаа шугумун ажыглалче киирери планнаттынган. Владислав Ховалыг ужуражылганың төнчүзүнде, энергетика ведомствозунуң баштыңын энергетика объектилериниң тудуу кайы хире чоруп турарын боду хынап, адырның перспективтиг хөгжүлдезиниң талазы-биле стратегтиг хуралга киржип кээр кылдыр Тыва Республикаже чалаан.
А. МОНГУШ.
Чурукту ТР-ниң Чазааның парлалга албанындан алган.
«Шын №31 2025 чылдың август 14