Хүл төгер бункерни септеп турар. / Чаа-Хөлден медээлер.

Республикада кышка белеткел ажылдары кожуун бүрүзүнде кидин түлүк чоруп турар. Чаа-Хөл кожуунда одалга төвүнде план ёзугаар кылыр чогуур ажылдар уламчылап турар.
Даваа Владислав. “Башкарыкчы компания ТЭК 4”-түң Чаа-Хөл участогунуң инженери.
– Эрткен кышты эки кыштаан бис. Бүдүрүлгеде 32 кижи демниг ажылдап, акша-шалыңны үе-шаанда ап турар. Бо одалга чери 50 ажыг бажыңнарже чылыгны берип турар. Ооң иштинде школа, уруглар сады болгаш өске-даа социал объектилер кирип турар. Эрткен кыжын Чадаананың хөмүр-даш уургайының хөмүрү-биле одап кыштаан бис. Хомудал чок, шынары эки хөмүр болган. Бир хонукта 20 тонна хөмүрнү одаар чордувус. Кышка белеткел ажылдарын план ёзугаар июнь айдан эгелеп чоруда бердивис. Ам бо чылгы одалга сезонунга чедир планда көрдүнген септелгелерни доозуп алзывысса, кышка белеткеливис доостур.
Калбак Валерий. “Башкарыкчы компания ТЭК 4”-түң Чаа-Хөл участогунуң улуг узаныкчызы (слесарь).
– Септеле ажылын июнь 1-ден эгелей берген бис. Ниитизи-биле бо одалга черинде 3 котёл бар. Эрткен чылын уш дугаарын чаартып каан. Шак-ла ындыг ажылды 1, 2 котёлдуң хүл төгер бункерлерин чаартып турар. Ону кыла бээривиске, ишти шуут өрттенип калган болган. Оозун бодаарга, 20–30 чыл-даа септеттинмейн турганы илдең. Ам болза, бир котелга 960 бичии шойдан кылган колосниктерни салыр бис. Бо колосниктерни башкарыкчы компания соңгаартан чагыдып эккеп турар. Ол чаңгыс хонуктуң ажылы эвес-тир. График езугаар бо ажылды чеди ай төнчүзүнде доозар бис.

К. Монгуш.