Хүлээп алырынга белен

Август 6-да Курск облазы Украинаның чепсектиг күштериниң оор халдаашкынындан когараан. Украинаның Чепсектиг күштериниң бир муң хире шериглери Курск облазының Суджа районунуң девискээринде участокту эжелеп алыр сорулгалыг халдаан. 31 кижи, ооң аразында алды бичии уруг кемдеп-когараан. Областың тайбың дөрт чурттакчызы мөчээн, чамдык улус берге байдалда.

Күрүне кызыгаарының ажылдакчыларының демниг хөделгениниң түңнелинде, дайзын Курск облазынче хандыр кирип шыдаваан. Россияның Камгалал яамызының дыңнатканы-биле алырга, «Север» шериг бөлүүнүң кезектери Россияның ФАА органнары-биле кады российжи-украин кызыгаарда чыдар Курск облазының Суджа база Коренево районнарында УЧК арткан шериг бөлүктерин узуткаан.
Курск облазынче УЧК халдаашкынының соонда Россияның Истелге комитеди терроржу акт, өлүрүүшкүн, хоойлуга удур ок-чепсек ажыглааны, корум-чурум камгалаар органнар ажылдакчыларының амы-тынынче халдааны дээш элээн каш чүүлдерге даянгаш, кеземче херектерин оттурган.

Россияның Президентизи Владимир Путин УЧК халдаашкынын «улуг чөңгээлээшкин-дир» деп демдеглээн. Областың чурттакчыларынга дузаламчы көргүзер даалганы РФ-тиң Баштыңы чогуур органнарга берген.

Севастопольдан Астрахань облазынга чедир дуза көргүзеринге беленин Россияның дыка хөй регионнарының Баштыңнары илереткен. Москва, Санкт-Петербург, Белгород база өске-даа хоорайларның удуртулгазы когараан регионче эмчилер, камгалакчылар база волонтёрларны чоруткан. Халдаашкын болган региондан 3 муң хире кижини өскээр көжүрген. Түр үеде чурттадыр пунктуларда бир муң ажыг кижини чыттырган.

Ол ышкаш Тыва Республика өске регионнар-биле деңге Курск облазының чурттакчыларынга дуза кадарынга беленин дыңнаткан. ТР-ниң Баштыңы Владислав Ховалыгның даалгазын езугаар элээн каш шиитпирни хүлээп алган. Айыыл-халапка таварышкан регионче гуманитарлыг дузаны Тывадан чоруткан. Курск хоорайның чурттакчыларынга деткимчениң сөстерин база айыыл-халапка таварышкан улуска дуза чедиреринге беленин бистиң республиканың чурттакчылары социал четкилерде илередип турар.

«Сөөлгү медээлер дээш чаңгыс чер чурттугларымның сагыш човаашкынынга база катап бүзүредим. Өскениң ажыг-шүжүү деп чүве бисте чок. Хөй националдыг Тываның болгаш бодумнуң өмүнээмден Курск облазының чурттакчыларынга деткимчениң сөстерин илередип тур мен. Тайбың чурттакчыларже халдаан дайзынның дерзии аргаларын буруу шаптым. Ук область бүгү талазы-биле деткимчени алыр дээрзин дээди кол командылакчы, чурттуң Президентизи дыңнаткан болгай. Бүгү бергелерни дем-биле кады ажып эрте бээр бис» – деп, Тываның Баштыңы Владислав Ховалыг чугаалаан.

«Чаңгыс демниг Россия» партияның регионалдыг салбыры гуманитарлыг чүък чыыр болгаш ону чедирер ажылды организастаан. Ол ышкаш республика бюджединден акша-төгерик-биле дузаны аңгылаар. Оон аңгыда, Курск облазындан өскээр чайладып көжүрген чонну хүлээп алырынга Тыва белен.

А. МОҢГУШ.
Чурукту интернет четкизинден хоолгалаан.

"Шын" №60 2024 чылдың август 10