Тываның Политехниктиг техникумунуң баазазында Республиканың хүлээп алыышкын комиссиязы ажылын уламчылап турар. Абитуриентилерниң документилерин хүлээр ажылда өске регионнарның дээди өөредилге черлериниң (ВУЗ) үнүүшкүннүг хүлээп алыышкын комиссиязының төлээлери база киржип турар. Ол ышкаш республиканың яамыларының болгаш ведомстволарының специалистери өөредилге албан черлеринче кирерде, тускай сорулгалыг олуттарга дугуржулга талазы-биле айтырыгларга консультацияларны доозукчуларга болгаш ада-иелерге чорудуп турар.
Бо хүнде Бурятияның күрүнениң көдээ ажыл-агый академиязы, Бурятияның күрүне университеди (Улан-Удэ), Кузбасстың күрүнениң көдээ ажыл-агый академиязы (Кемерово), Алтайның күрүне университеди (Барнаул) болгаш Сибирьниң күрүнениң эртем болгаш технологиялар университеди (Красноярск) хүлээп алыышкынны чорудуп турар.
Июль 11-ден тура Сибирь Федералдыг университеттиң Шериг-инженер институдунуң (ВИИ СФУ) үнүүшкүннүг хүлээп алыышкын комиссиязы ажылын эгелээр. Аңаа «Тускай радиотехниктиг системалар» болгаш «Чер кырының транспорт-технологтуг чепсек-херекселдери» деп мергежилдерге өөренир күзелдиглерниң документилерин хүлээп эгелээр.
Республиканың хүлээп алыышкын комиссиязы ыраккы кожууннарда чурттап турар абитуриентилерге эптиг аргаларны тургузары-биле, үнүүшкүннерни кылып эгелээн. Баштай Эрзин болгаш Тес-Хем кожууннардан эгелеп алган.
Республиканың хүлээп алыышкын комиссиязының ажылдап турар адрези: Кызыл хоорай, Салчак Тока кудумчузу, бажың 14 (кол корпус).