Бо чылын республиканың чурттакчылары күрүнениң хөмүр шыгжаар черлеринден хөмүрнү садып алырлар. Чеди кожуун төптеринде хөмүр шыгжаар черлерни эде чаартып, септеп, амгы үениң деңзилерин салып, видеохайгаарал системазын кожар. А Кызыл хоорайга чаа складты тудар.
Тываның Баштыңы Владислав Ховалыгның даалгазы-биле, хөмүрнүң чедишпезин болдурбас база өртекти кара туразында өстүрер чорукту чок кылыр дээш бо ажылдарны чорудуп турар.
Республиканың чуртталга-коммунал ажыл-агый сайыды Мерген Мынын-оол Таңды, Тес-Хем база Эрзин кожууннарда хөмүр шыгжаар черлерни тудуп, чаагайжытканын Аппарат хуралында илеткээн. Бо чоокку хүннерде Кызыл, Бай-Тайга, Барыын-Хемчик, Мөңгүн-Тайга, Өвүр кожууннар ол ажылдарны доозар. Дөрт кожууннуң хөмүр шыгжаар черинге чаа килдерни эптээри-биле саткан.
Тываның Чуртталга-коммунал ажыл-агый яамызы хөмүр сөөртүр база аай-дедир дажыглаарынга херек тускай техникалар – КамАЗ К2020 деп 12 автосамосвалдарны, кыдыындан чүдүрер 12 чүък машиналарын саткан. А хөмүр шыгжаар черлерниң бодунга «ТОНАР» деп 4, «КамАЗ» деп 4 самосвалды, «НефАЗ» деп 9 кожугну болгаш 2 «МАЗ» деп улуг чүък чүдүрер автотехниканы садарын планнаан. Шупту техниканы GPS-навигатор болгаш видеокамералар-биле четчелээн. Хөй тонна чүдүрер самосвал машиналар бо неделяда Тывага чедип келир.
Чаартып, дерээн хөмүр складтарынга харыысалгалыг ажылдакчылардан шилип, ажылдадыр арганы кожуун чагырга даргаларынга берген. Кожууннарның складтарын чүгле чаартыр эвес, а аар өртектиг техниканы база килдерни камнап, ону шынарлыг ажылдадырын чедип алыры – тус черниң кол айтырыы.
Кожууннарда улуг складтарда тудуг ажылдары доостуру билек, ону ажыглалче дарый киирер. Сентябрь 10-га чедир ол ажылдар доосту бээрин Чуртталга-коммунал ажыл-агый яамызы аазаан. Бо неделяда республикада «Социал хөмүр» төлевилели-биле одаар чүүлдү дүжүрүп эгелээр.
ТР-ниң Чазааның парлалга албаны.