Чоннуң чаңгыс деминиң хүнү-биле ТР-ниң хөй нация чонунга болгаш бүгү улуг Россиявыска Дээди Хуралдың депутаттарының өмүнээзинден байыр чедирерин чөпшээреп көрүңер!
Россия чүс-чүс чылдар дургузунда янзы-бүрү улуг-биче чоннарны каттыштырбышаан, боду күштелип, хөй нация болгаш хөй шажын-чүдүлгелиг чурт болу берген. Күрүнениң составынче хөй санныг чоннар эки тура-биле кирип турган, чүге дизе оларның келир үези, хөгжүлдези Россия-биле холбашкан болурун билип турганнар. Бистиң Тыва-биле база ындыг болган. Россия биле Тываның найыралы чүс-чүс чылдарның харылзаалары-биле быжыглаттынган. Бистиң республика аңгы-аңгы нацияларның болгаш чүдүлгелерниң кижилери чаңгыс девискээрге чаңгыс чон кылдыр эптиг-найыралдыг чурттап болурунуң үлегери болур. Күжүвүс – хөй янзывыста болгаш бот-тускай онзагай чоруувуста.
Россияның составынче Донецк болгаш Луганск республикаларның, Херсон болгаш Запорожье областарның каттыжып киргени-биле Чоннуң чаңгыс деминиң хүнү биске онза ужур-уткалыг апарган. Бистиң улуг чуртувус дуза дилеп турар черлерге камгалакчы болуп, холун дуза кылдыр сунган. Хамык-ла бергелерни, даштыкы халдаашкыннарны болгаш Ада-чурттуң Улуг дайынын ажып чорааш, чоннуң сырый каттыжылгазында улуг күш бар деп чүвени Россия чаңгыс эвес удаа бадыткап чоруур.
Амгы үеде бистиң дайынчыларывыс эрес-дидим өгбелеривис ышкаш эгин-кожа болуп алгаш, тускай шериг операцияның фронтуларында демисежип турар. Россия эрткен үениң өөредиглерин эки билир болгаш, РФ-тиң Президентизи Владимир Путинни, российжи шеригни долгандыр сырый каттышкан. Берге үелерде бистиң чуртувус кезээде чаңгыс демин бадыткап чораан. Амгы шагда база ындыг болур. Бистиң чонувустуң бедик соруу, хей-аъды кандыг-даа бергелерни ажып эртеринге дузалаар деп чүвеге бүзүрээр бис. Бистиң күжүвүс найыралда, чаңгыс демивисте, даартагы хүнге бүзүреливисте болгаш Төрээн чуртувустуң тиилеттирбес чоруунда.
Чоннуң чаңгыс деминиң хүнүнде силерге база силерниң чоок кижилериңерге кадыкшылды, менди-чаагай чорукту, тайбың дээрни, өг-бүлелериңерге эп-найыралды Дээди Хуралдың депутаттары сеткиливис ханызындан күзеп тур бис.
Байырлал-биле!
ТР-ниң Дээди Хуралының Даргазы К. ДАВАА.
“Шын” №84 2023 чылдың ноябрь 4