Хүндүлүг дайынның болгаш тылдың хоочуннары!Хүндүлүг чаңгыс чер чурттугларым!

Бо кайгамчык чырык байырлыг хүннү делегейниң хөй-хөй чурттары демдеглеп эрттирер. Чүге дизе Ада-чурттуң Улуг дайыны он-он чурттарга экономиктиг хоозуралды, сая-сая кижи чидириглерин чедирген. Бистиң күрүневис – агрессорнуң хендирбезин сыпкан чуртувус, бүгү талазы-биле эң коргунчуг когаралга таварышкан. Ол үеде бистиң өгбелеривис – ТАР-ның чону база өлүмнүг демиселдиң хажыызынга турбайн, фашистиг Германияга удур дайынга эң идепкейлиг киришкен.

Бис өгбелеривистиң маадырлыг чоруунга мөгейип чоруур бис. Чүс-чүс, муң-муң чылдар эртер-даа болза, Ада-чурттуң Улуг дайынының чылдарында совет чоннуң көргүскен маадырлыг чоруу имистелип өжүп читпес. Оларның маадырлыг чоруун амгы салгалдар – Российжи армияның шериглери, ооң иштинде тыва оолдар, уламчылап турар. Бис тускай шериг операцияда оолдарывыс бүдүн-бүрүн чанып кээрин кижи бүрүзүнге күзеп турар бис.

Май 9 – Тиилелге хүнүнүң кайгамчык байырлалын таварыштыр силерге аас-кежикти, кадыкшылды, амыр-тайбыңны күзедивис! Өгбелеривистиң оттуг-көстүг дайын чылдарында маадырлыг чоруунга төлептиг салгал болуп артаалыңар!

Хүндүткел-биле,
ТР-ниң Дээди Хуралының (парламентизиниң) Даргазы К. ДАВАА.

"Шын" №33 2023 чылдың май 6