Чайның изиг хүннеринде уругларның кадыын дадыктырып, оларга уттундурбас, оюн-хөглүг дыштанылганы эрттирер дугайында, бир дугаарында, ада-иелер сагыш човап турар. Олар-биле база бир деңге Тываның Чазаа республиканың уругларынга база оларның ада-иелеринге чайгы дыштанылганы ажыктыг болгаш уттундурбас солун кылдыр эрттиреринге бүгү-ле таарымчалыг байдалдарны тургузуп турар. Тываның 175 школаларында 71110 уруг өөренип турар. Оларның аразындан 34 муң хире уругну хүндүскү болгаш стационар лагерьлерге дыштандырары көрдүнген.
Халас путёвкалар
Уругларны лагерьлерге халас дыштандырарының дугайында күш-ажыл болгаш социал политика сайыдының оралакчызы Чечен Дудуп допчузу-биле тайылбырны берген. Ооң дыңнадып турары-биле алырга, яамының акшаландырыышкыны-биле тускай категорияга хамааржыр өг-бүлелерниң уругларын, 2497 уругну, хүндүскү болгаш стационар лагерьлерге халас дыштандырар. Аңаа социал байдалы берге, хөй ажы-төлдүг, орулгазы чедишпес өг-бүлелерниң уруглары, өскүс уруглар база тускай шериг операциязының киржикчилериниң ажы-төлү хамааржыр. 870 уругну "Орленок", "Чагытай", "Байлак", "Меңги-Чечээ", "Бельбей" дээн ышкаш республиканың улуг стационар лагерьлеринге дыштандырар.
ТШО киржикчилериниң уругларынга
Тускай шериг операциязының киржикчилериниң уругларынга I дугаар дыштанылга сезонунче дараазында лагерьлерниң "Орленок" – 50, "Чагы- тай" – 50, "Байлак" – 50 халас путёвкаларны белеткээн. II дугаар дыштанылга сезонунда "Байлак" болгаш "Бельбей" лагерьлеринче 50-50 путевкаларны, III дугаар сезонда "Орленок" – 50, "Чагы- тай" – 50, "Байлак" – 50, "Бельбей" – 50 путевка 200 уругга көрдүнген.
Тускай шериг операциязында керээ-биле киржип турар, мөөңнээшкин-биле болгаш “Вагнер” бөлүүнүң киржикчилериниң уруглары үстүнде хуваап каан сан-чурагай ёзугаар лагерьлерге халас дыштаныр.
Арткан уругларга
Социал байдалы берге, орулгазы чедишпес, хөй ажы-төлдүг өг-бүлелерниң болгаш өскүс база ада-иезиниң хайгааралы чокка арткан уругларга Күш-ажыл болгаш социал политика яамызының эргезинде турар кожууннарның социал төптериниң баазазынга халас дыштаныр аргаларны чылдың-на организастап турар. Чагытай хөлдүң эриинде 232 олуттуг “Байлак”, Чеди-Хөлдүң “Металлург” лагеринге 20 олутка, Барыын-Хемчиктиң "Шолбан-Ак" – 50 олутка база Мөңгүн-Тайганың социал төвүнүң “Меңги-Чечээнге” – 50 олутка арткан категорияның уругларын дыштандырар.
Чечена Дудуптуң медеглээни-биле, "Чагытай", "Орленок" лагерьлериниң I биле III дугаар сезонунуң путёвкаларын 160 уругга долузу-биле Күш-ажыл яамызының акшаландырыышкыны-биле саткан. I дугаар сезонче тускай шериг операциязының киржикчилериниң уругларындан аңгыда, өске категорияга хамааржыр өг-бүлелерниң уругларынга олуттар дола бергенин база дыңнаткан.
"Чагытай" болгаш "Орленок" лагерьлериниң II дугаар сезонунуң путёвкаларын лагерьниң удуртулгазы боттары садып турар дээрзи билдингир. Олар күрүнеден хостуг, хууда организациялар болгаш, изиг чайның кидин түлүк сезонунуң путевкаларын боттары садар сорулгалыг.
Халас дыштаныр путёвканы алыр дизе Күш-ажыл болгаш социал политика яамызы дараазында документилерни четчелээрин дыңнадып турар:
- ада-иениң паспорт документизи,
- уругларның төрүттүнген дугайында херечилели база паспорту,
- өг-бүлениң тускай категорияга хамааржыр дугайында шынзылгазы,
- эмчи справказы,
- тарылга сертификады.
"Шын" №41 2023 чылдың июнь 7