Тускай дайынчы операцияга керээлиг киржир дээш азы эки туразы-биле халас киржир дээш шериг албанынга кирер дээн кижилерниң эмчи шинчилгезин өртек чок үндезинге чорудар шиитпирни республиканың Кадык камгалал яамызы Тыва Республиканың Баштыңы Владислав Ховалыгның даалгазы-биле хүлээп алган. Бо халас эмчи шинчилгези шериг албан-хүлээлгелиглерге чедирип турар медицина ачы-дузазынга немелде хемчег.
Тыва Республиканың Шериг комиссариадының чорутканы-биле керээлиг болгаш эки турачы хамаатыларның эмчи шинчилгезин халас эрттирериниң дугайында шиитпирни республиканың удуртукчузунуң адынга социал четкилер дамчыштыр келген саналга үндезилеп хүлээп алган. Тускай дайынчы операцияга керээлиг азы эки туразы-биле халас киржир дээн кижилер тускай эмчи шинчилгелерин эрттирер, хөй эмчи шынзылгаларын чыып алыр дээш акша төлеп турарын ук хамааты дыңнаткан. Эмчи шинчилгези эрттирип турарларның аразында амыдырал-чуртталгазының материалдыг байдалы аңгы-аңгы деңнелдиг, оларның иштинде хөй ажы-төлдүг, ажыл чок, өг-бүлези чединмес чуртталгалыг кижилер барын ол хамааты демдеглээн. Ол эр кижилер шупту дайынче чоруур, Ада-чуртту камгалаар кижилер дээрзин ол-ла хамааты сагындырган. Бо хамаатының дыңнадыында чөптүг чүүлдер барын Тываның Баштыңы билип, тускай дайынчы операцияга контрактылыг азы эки туразы-биле халас киржир кижилерниң эмчи шинчилгезин халас үндезинге организастаарын дааскан.
Ынчангаш тускай дайынчы операцияга керээлиг азы эки туразы-биле халас киржир кижилер Тыва Республиканың Шериг комиссариадының азы ооң салбырларының бижиин эмчи шинчилгези чорудуп турар медицина албан черлеринге көргүскеш, шинчилгени халас эртип болур арга тургустунган.
Тускай дайынчы операцияның 159 киржикчизинге болгаш оларның өг-бүлелериниң кежигүннеринге халас медицина ачы-дузазын көргүзериниң девискээр программазы ёзугаар (ОМС-тиң полизи-биле) медицина организацияларынга халас реабилитация болгаш эмнелге ачы-дузазын Владислав Ховалыгның даалгазы-биле 2022 чылда чедирген.
Бир эвес медицина камгалалының полизи чок-даа болза, амбулаторлуг байдалга баш бурунгаар эмчи шинчилгезин эрттирер дугайында шериг кезээнден шынзылга бар болза, шериг албан-хүлээлгелиг хамааты болгаш ооң өг-бүлезиниң кежигүннери республиканың № 2 эмнелгеге кээп, эмчи шинчилгезин эрттирип болур. Эмчи шинчилелдериниң түңнели-биле шериг албан-хүлээлгелиг хамааты болгаш ооң өг-бүлезиниң кежигүннери “Серебрянка” санаторийге азы республиканың № 1 эмнелгениң реабилитация салбырынга эмнелге ачы-дузазын ап болурлар.
Шериг албан-хүлээлгелиг хамаатыга болгаш ооң өг-бүлезиниң кежигүннеринге эмнелге ачы-дузазын болгаш психологтуг дузаны республиканың өске-даа медицина албан черлеринде чедирип турар.
Бистиң корр.