Өвүр кожууннуң административтиг төвү Хандагайты суурга «Чагыглардан – боттуг ажыл-херекче» деп Улусчу программа 2.0-че санал-оналдарын киирер төгерик стол болган. Киржикчилерниң аразында Россияның Маадыры, «Тываның маадырлары» регионалдыг программаның киржикчизи, «Чаңгыс демниг Россия» партияның баш удур бадылаашкынче кирген кандидат Буян Куулар, хөй-ниити организацияларындан идепкейжилер болгаш удуртукчулар, тускай шериг операциязының киржикчилериниң өг-бүле кежигүннери киришкен.
Кожууннуң чурттакчылары федералдыг деткимчениң чугулазының дугайында айтырыгларны болгаш боттарының эгелекчи саналдарын дыңнаткан. Шупту дилеглер демдеглеп алдынган. Шилилгениң түңнелинде оларны партияның Улусчу программазынче киирер.
«Чаңгыс демниг Россия» партияның регион салбырының секретары, Тываның Баштыңы Владислав Ховалыг төгерик стол хемчегниң ажылынга стартты берген. Ол ооң мурнунда «Улусчу программа партияның ажылының үндезини, ажыл-херекче дорт удуртулга болдуруп келгенин болгаш ам-даа болуп артарын» демдеглээн.
Чыгдынган шупту чагыглар улусчу программаны хевирлээр, а ооң соонда партийжи болгаш национал төлевилелдерниң үндезинин тургузар. «Чаңгыс демниг Россия» соңгукчуларга эң-не төлептиг кандидаттарны тодарадыр арганы берип, баш удур бадылаашкынны чорудуп турар чуртта дың чаңгыс партия болур.
Соңгукчуларның санал-оналынга даянып, кандидаттарны шилиири-биле баш бурунгаар бадылаашкынны чорудар. РФ-тиң 21 хардан өрү назылыг, шииттирип чорбаан болгаш даштыкыда саң-хөө херекселдери чок хамаатыларны киириштирер. Партияның кежигүннери, партийжи эвес кижилер-даа, ТШО-нуң киржикчилери болгаш волонтерлар-даа киржип болур.
Чадалары:
* Март 11-ден апрель 30-ге чедир кандидаттарны идип үндүрер.
* Апрель 20-ден май 29-ка чедир соңгукчуларны бүрүткээр.
* Май 25-тен 31-ге чедир pg.er.ru. сайтка электроннуг хевирге бадылаашкынны эрттирер.
“Чаңгыс Демниг Россия” партияның тырттырган чуруктары.