Дүүн хоорайның төвүнге коргунчуг өлүрүүшкүн болган. Ногаан футболка, кара өңнүг чүвүр, чеңи-чок кеткен билдинмес эр кижи аныяк уругну хөй катап бижектээн. Бо медээ-дыңнадыг, видеобижидилге соцчеткилерге дыргын тарай берген.
Аңаа холбаштыр Тыва Республиканың ИХЯ-зының парлалга албаны мындыг дыңнадыгны берип турар.
“Ук кем-херек үүлгедиишкининге холбаштыр кеземе херээн (өлүрүүшкүн) оттурган. Каразыттырып турар кижини тудуп хоругдааш, шагдаа черинге дужааган. Өлүрүкчүнү Росгвардияның ажылдакчылары божуу-далаш туткан. Баш бурунгааргы медээден алырга, кем-херек үүлгедикчизи шизофрения дээш эмчи даңзызында турары илерээн. Когараан кижи ТывКУ-нуң 4-кү курузунуң 23 харлыг студентизи. Кем-херек үүлгедикчизи 36 харлыг.
Бо ханныг болуушкунга холбаштыр Тываның Баштыңы Владислав Ховалыгның бодунуң блогунда бижии: “Мээң даалгам езугаар ниити координация ажылдарын чазактың оралакчы даргазы Виталий Бартына-Сады боттандырып турар. Херечилерниң өчүүнден алырга, алгыш-кырыш кем-херек үүлгедиишкининиң чылдагааны болуп турар. Тодаргайлаашкынны истелге илереди бээр. Чырык хүндүс, хөй улус-чон кылаштажып турар черге кем-херек үүлгедикчизи каржы-дошкун халдаашкынны кылгаш, таваар оожум чоруй барган. Чүгле харын ийи элээди оол өлүрүкчүнүң соондан сүрүп, ону тударын оралдашкан. Ындыг чүүл база катап бот-боттарывысты хүндүлежип, деткижип, дузалажып, хумагалыг болурувусту көргүзүп турар. Бүгү ниитилел мындыг тоомчалыг болур болзувусса, моон-даа соңгаар хай-халапты чайладып шыдаарывыска бүзүрелдиг мен.
Когараан уругнуң кады төрээннеринге, чоок кижилеринге ханы кажыыдалым илередип тур мен ” — деп, В. Ховалыг бижип турар.
Бистиң корр.
"Шын" №45 2023 чылдың июнь 21