Сукпак суурда кадык-чаагай амыдыралды чурттакчы чон аразынга суртаалдап чоруур «Хараачыгай» бөлүү тургустунгандан бээр 5 чыл болуп турар.
Бо бөлүктүң кежигүннери Сукпак суурнуң херээжен чонунга эртенги сула шимчээшкиннерни организастап турар. «Хараачыгайлар» чайгы үеде Улуг-Хем эриинге көктүг шыкка чыглып алгаш, сула шимчээшкиннерни кылырындан аңгыда, эрик кыдыының богун аштап-арыглап, ында дыштанып келген чонга бойдуска хумагалыг болурун чагып, тайылбыр ажылын база чорудуп турарлар. Кышкы үеде дош кырлап ортулукче кешкеш, доңмас кара-сугну мага хандыр ижип, агаарлап алгаш, улаштыр Культура бажыңының бир өрээлинге сула шимчээшкиннер кылып турарлар.
Беш чыл иштинде бөлүктүң кежигүннери өске хоорай, суурларже көжүп чоруп, чаа кежигүннер немежип турар.
«Хаарачыгайның» кежигүннери шупту херээжен чон болганда, ажы-төлү, бажың-балгады, ажыл-агыйы дээш-ле чайы чок боор. Ынчангаш бот-боттарынга дузалажып, деткижери, оларның чаагай чаңчылы. Хостуг үезинде Кызыл хоорайның театрынга концерт, шиилер, янзы-бүрү культура хемчеглеринден чыда калбайн турарлар.
Чоокта чаа найысылалда улуг хүрээни ажыдар мурнунда, аштап-арыглаар ажылдар кылчып, боттарының үлүг-хуузун киириштирген.
Беш чыл болуп турар бөлүктү суму, кожуун чагырга чери кичээнгейге ап көөр болза, оларның ажыл-чорудулгазы моон-даа соңгаар ам-даа хөгжүүр. Республиканың өске-даа хоорай, суурлары «Хараачыгайлардан» үлегер алырын күзээр-дир мен.
Николай БЯКОВ, күш-ажылдың хоочуну.
"Шын" №45 2023 чылдың июнь 21