| Бок айтырыы |
Бодунуң богун үндүр сөөртүр эрге кымда-даа чок. Ону чүгле регионда коммунал кадыг боктар-биле ажылдаар оператор бок полигонунче үндүр сөөртүр. Бир эвес бодувус азы хөлезилеп алган киживис богувусту сөөртүп аппаргаш, төпкени билдинер болза, хөй түңнүг акша торгаалга онаажып болур бис.
Хамаатылар боттары бажыңнарының чанынга тургузуп ап болур контейнерлерни «Транспорт сервизи болгаш төлевилел» күрүнениң унитарлыг бүдүрүлгези чонга садып турар. Бир контейнерниң өртээ 20–21 муң рубль. Ол контейнерде бокту машиналар график ёзугаар үндүр сөөртүп кааптар. Ол ачы-дуза дээш немелде төлевир чок, ооң өртээн ай санында төлевирлерже киирген.
Кызыл хоорайның Рихард Зорге кудумчузунга турган улуг ногаан бункерни ап каапканы-биле тус черниң чурттакчылары бок октаар контейнер садып салыр ужурга таваржып турар. Бок төгер контейнер садарының чуруму мындыг: «Транспорт сервизи болгаш төлевилел» күрүнениң унитарлыг бүдүрүлгезинче долгаар азы Кызыл хоорайның Кочетов кудумчузунуң 30 дугаарлыг бажыңында 15А дугаарлыг кабинетке чеде бээр азы 89833650154 деп дугаарже долгапкаш, адрезиңерни адааш, бок октаар контейнер садып алыр дугайында чугаалаар силер. Диспетчер силерге бок төгер контейнер кылып, бүдүрүп турар хууда сайгарлыкчының телефонунуң дугаарын айтып бээр. Шак ол дугаарже долгааш, контейнерниң өртээн төлээш, адрезиңерни айтып каар силер. Хууда сайгарлыкчы А.А. Бегзин-оол контейнерни айыткан адрезиңерге эккеп бээр. Ооң соонда 5-39-10 деп дугаарже долгааш, адрезиңерни айыткаш, бок төгер контейнерни садып белеткеп алганыңарны дамчыдыптарыңарга, регионалдыг оператор график ёзугаар силерниң богуңарны үндүр сөөртүп эгелээр.
Бир эвес телефон таварыштыр эвес, а бодуңар барып айтырып, чорууңар чогудуксаар болзуңарза, кабинет чүгле четверг хүнүнде хүлээвес, а неделяның арткан хүннеринде эртенгиниң 08.00 шактан кежээ 17.00 шакка чедир хамаатыларны хүлээп турар. 12.00 шактан 13.00 шакка чедир ажылдакчыларның дүъштээрин утпаза чогуур.
А бир эвес хууда кижилерден аңгыда, албан черлери контейнер садып алыр дээн болза, дараазында 8-913-350-11-74 дугаарже долгааш, билдинмес чүүлдерни айтырар.
Көдээ черлерде контейнерлер чок таварылгаларда бокту шоодайлааш, график ёзугаар кээр машиналарга чүдүрүп болур. Бо арганы хоойлу-дүрүм ёзугаар чөпшээрээн. Чижээлээрге, Өвүр кожуунче неделяның бир хүнүнде бок сөөртүр регионалдыг оператор Чадаанадан барып турар. Регионалдыг операторнуң бок чүдүрер техниказы чоруп олурар деп медээни тус черниң чурттакчы чону алгаш-ла, каш хонук дургузунда чыып алган богун кудумчуже үндүр салыптарлар. Хандагайтыжылар шак ол бок системазынга чаңчыга берген.
Бир чылда ортумаа-биле 420 килограмм бокту РФ-тиң хамаатызы «бүдүрүп», ону үндүр октап турарын тускай шинчилелдер тодараткан. Ол бокту чыггаш, чурттап турар черинден үндүр сөөрткен, болбаазырадып чок кылган болур ужурлуг дээрзин сагындыраал. Ынчап кээрге бок дээш харыысалга кижи бүрүзүнде.
Авторнуң тырттырган чуруу.
Арынны Айдың ОНДАР белеткээн.
“Шын” №13 2026 чылдың апрель 9