Тываның Чазаанга ТР-ниң Чазааның Даргазының оралакчызы Тимур Кууларның удуртулгазы-биле болган хуралга республиканың суг объектилеринге амы-тынындан чарылган уругларның дугайында болгаш моон соңгаар ындыг айыыл-халап болбазын дээш, кандыг хемчеглер алырын чугаалашкан.
Суг объектилеринге чоннуң айыыл чок чоруун хандырар талазы-биле ажылды чорудуп, улуг кичээнгейни салып турза-даа, айыыл-халап улуг-биче кижилерни амы-тынындан чарып аппаар таварылгалар бар. Эштир сезон эгезинден тура сугга 7 уруг дүжүп, амы-тынындан чарылган. Ооң кол чылдагааны – назы четпээн уругларның улуг улус хайгааралы чокка эштип турганы.
Тываның хамааты камгалал болгаш онза байдалдар талазы-биле албанының удуртукчузу Сергек Шактар илеткелинде айыыл-халап хөй кезиинде эштири хоруглуг черлерде болуп турарын демдеглээн. Ол ышкаш удуртукчунуң илеткелинден алырга, улуг улус эзиртир суксун ижип алгаш, эштип турганындан, а бичии уруглар улуг улустуң хайгааралы чокка сугга киргенинден айыыл-халапка таваржып турар.
Тимур Куулар Тываның Хамааты камгалал болгаш онза байдалдар талазы-биле албаны биле ОБЯ-ның ажылдакчыларынга профилактиктиг хыналдаларны көвүдедирин сүмелээн. Ол ышкаш ажы-төлү хайгаарал чокка суг объектилеринге келген, хүлээлгезин күүсетпейн турар ада-иелерге хамаарыштыр хемчеглерни тайылбыр бижидеринден эгелээш, административтиг протокол долдурарынга чедир шыңгыырадырын саналдаан.
Чазак Даргазының оралакчызы суг объектилеринге айыыл-халап дээш харыысалганы кожууннар чагырыкчыларынга онаарын саналдаан. Тимур Куулар Тываның Хамааты камгалал болгаш онза байдалдар талазы-биле албанынга республиканың суг объектилеринге айыыл-халап бодурбазы-биле чорудар хемчелерни ажылдап кылырын дааскан.
Ш. Ондар.