Тывада IV делегей чергелиг буддийжи шуулганның белеткел оргкомитеди 2026 чылда болуп эртер хемчегниң программазын тургускан. Республиканың Баштыңы Владислав Ховалыг Чазак бажыңынга оргкомитеттиң ээлчеглиг хуралын удуртуп эрттирген соонда, ооң дугайында телеграм-каналынга дыңнаткан. Шуулганны эрттирерин харыылап турар ведомстволар төлээлериниң шак ындыг ужуражылгалары неделя санында эртип турар.
Ужуражылгага шуулган хемчеглериниң ажыл-агыйжы кезээниң кол талаларын тодарадып чугаалашкан деп регионнуң удуртукчузу дыңнаткан. Ооң дыңнадыы-биле алырга, шуулганның программазы колдуунда тургустунган, ам шупту хемчеглерниң бүгү-ле кезектерин таптыг хынааш, бадылаары арткан.
«Хемчег бүрүзүн: пленарлыг хуралдарның темаларын, спикерлерниң даңзызын, тематиктиг шөлдер каяа турарын дээш оон-даа өске чүүлдерни сайгарып көрдүвүс» — деп, Владислав Ховалыг чугаалаан.
Киржикчилерниң аккредитациязын, ооң иштинде даштыкы аалчыларны база очулдурукчуларны хаара тударының аргаларын база аңгы чугаалашкан. Аалчыларны шуулганның чүгле эртем кезээнге киириштирер эвес, а Тываның онзагай культуразын болгаш ёзу-чаңчылдарын хандыр таныштырар сорулгалыг экскурсия программазын база ажылдап кылган.
«Хемчегни бедик деңнелге эрттирип, чугаалажылганың болгаш арга-дуржулга солчулгазының езулуг ажыктыг шөлү тургустуна бээринге бүзүрээр мен» — деп, Владислав Ховалыг демдеглээн.
Август 17–20 хүннеринде Тывага IV делегей чергелиг буддийжи шуулган болуп эртерин сагындыраал. Аңаа чээрби хире чурттардан шажын болгаш хөй-ниити ажылдакчылары киржир. Баштайгы ийи буддийжи шуулган Бурятияга, а үш дугаары 2025 чылдың сентябрьда Калмыкияга болуп эрткен. Буддизм өөредилгезин болгаш эртем-шинчилелдерин деткиир фондунуң Тургузукчулар чөвүлелиниң Москвага болуп эрткен хуралынга IV делегей чергелиг буддийжи шуулганны Тывага эрттирер дугайында шиитпир хүлээп алдынган. Ол эгелээшкинни Россияның Президентизи Владимир Путин деткээн.
ТР-ниң Чазааның медээзинден.
Чуруктарны интернет четкизинден алган.
“Шын №2 2025 чылдың январь 22