Октябрь 1 — Бүгү-делегейниң кыраан назылыглар хүнүнге
Эрткен чүс чыл элендизи,
Бо чүс чылдың богу-дур мен.
Эртем-билиим эвээш-даа бол,
Борастанып чурттап чор мен.
Аштап-түреп чораанывыс
Артывыста артып калган.
Ыя ону черле утпайн,
Ында-хаая бодап чор мен.
Эмнелгени, школаны
Эрги Тыва көрген эвес.
Бижик туржук, «тыва» дээр сөс
Биске ынчан турган эвес.
Электри, сайгылгаан-даа
Эдилелге кирген эвес.
Акша-шалың, пенсия-даа
Алага-тек үе туржук.
Шак-ла мындыг чуртталгадан
Шапкын хөгжүп эгелээн бис.
Чаартылганы кылган улус
Чамдыывыс чок хоочуннар бис.
Сургуул дооспаан хиревисте,
Суурларны кымнар тутчук?
Саян ажыр чагы кадааш,
Сайгылгаанны кымнар кииржик?
Тракторнуң, машинаның
Дынын баштай кымнар тутчук?
Агаар-дээрже тейлээр тыва
Аэроплан кажан мунчук?
Дуу чүс чылдың кижилери
Тудуг кылып эгелээн бис.
Балды-биле чонуп туткан
Бажыңнар ам санаттынмас.
Эрткен чүс чыл кижилери —
Эгелекчи, хөгжүдүкчү.
Чокту бистер чогуткан бис,
Чонувуска дамчыткан бис.
Эң-не эки кежик-чолду
Эрткен чүс чыл биске берген.
Хензиг үлүүм ында боорга,
Херечи бооп, чарлап тур мен.
/ Чооду КАРА-КҮСКЕ,
Тыва Республиканың 1986 чылдан пенсионери.
01.10.2026 ч.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn