Регионнарның болгаш муниципалитеттерниң ачы-дузазын амгы үеде чүгле Күрүне ачы-дузазының чаңгыс аай порталы таварыштыр электроннуг азы саазынныг хевиринге хөй функцияларлыг төптерге “чаңгыс соңга” дамчыштыр ап болур. Чижээлээрге, кандыг-бир шынзылга алыр дээн болза, хүлээп алыышкынга баш бурунгаар бүрүткедип алыры, хүлээп алырын манаары, билдириишкин бижиири, элээн каш документилерни көргүзери дээн ышкаш чүүлдер хереглекчилерге аажок шүүттүг.
Бо бүгүнү дүргедедир сорулга-биле “Хамаатыларның боттарының чугула херектиг хууда киржилгези чокка күрүне болгаш муниципалдыг ачы-дузаларның эң хөй кезиин хонуктуң 24 шагының, неделяның 7 хонуунуң дургузунда көргүзеринче шилчиириниң Концепциязының дугайында” айтыышкынны 2022 чылдың апрель 11-де Россия Федерациязының Чазаа үндүрген.
Бо айтыышкынны херек кырында күүседириниң бир аргазы хөй функцияларлыг төптерге хереглекчилерге дуза секторларын тургузары болган. Электроннуг хевирге күрүне ачы-дузазын алыр дээн хамаатыларга тайылбыр болгаш организас-техниктиг деткимчени хереглекчилерге дуза секторларының специалистери көргүзерге, хереглекчи кижи Күрүне ачы-дузазының чаңгыс аай порталы болгаш күрүнениң ачы-дузазының өске-даа электроннуг хевирлери таварыштыр ачы-дузаны ап болур.
Күрүне болгаш муниципалдыг ачы-дузаның Кызыл хоорайда хөй функциялыг төвүнде хереглекчилерге дуза секторун октябрь 10-да ажыткан. “Тыва Республиканың хөй функциялыг төвү” күрүнениң автономнуг албан чериниң директору Аркадий Өдегейниң чугаазы-биле алырга, хереглекчилерге дуза сектору ажыттынган баштайгы хүнде-ле 50 хире хамаатылар ооң ачы-дузазын көрүп, бо секторнуң ажыттынганынга аажок таарзынганнар. Чүге дээрге олар күрүне болгаш муниципалдыг ачы-дузаның электроннуг хевирлерин боттары дүрген алыр аргалыг болганнар. Күрүне болгаш муниципалдыг ачы-дузаны көргүзеринден аңгыда, хамаатыларның документилерин электроннуг болгаш саазын хевиринге бо секторда хоолгалап берип турар. Аңаа база ачы-дуза ап келген кижилер аажок таарзынган.
Күрүне ачы-дузазын электроннуг хевирге ап чаңчыккан хамаатылар хереглээн документилерни боттары-ла долдуруп алыр аргалыг. Электроннуг хевирге күрүне ачы-дузазын ап чаңчыкпаан кижилерге хереглекчилерге дуза секторунуң ажылдакчылары дузалажып турар. Ындыг дуза, ылап-ла, дыка ажыктыг дээрзин Долума Ховалыг чугаалап, бажыңында компьютер чок кижи хереглекчилерге дуза секторунуң ажылдакчыларының дузазы-биле ачы-дузаны электроннуг хевирге алырынга өөренир деп шиитпирлээнин дыңнатты.
Хереглекчилерге дуза секторун Кызыл хоорайның хөй функциялыг төвүнде ажытканы күрүне ачы-дузазын электроннуг хевирге ап өөрениринге болгаш чаңчыгарынга дыка ажыктыг организастыг арга дээрзин Долума Ховалыгның шиитпири бадыткал деп болур. Бажыңнарында компьютерлер, электроннуг почта дээш амгы үениң харылзаазының техниктиг эт-херексели чок кижилер эвээш эвес болгай.
Шаңгыр-оол Моңгуш.
Ада Тюлюштуң тырттырган чуруктары.