«Социал керээ» программазы Тес-Хем кожуунда идепкейлиг боттанып турар. Куран арбанның чурттакчызы Шугдуржап Аракчаа социал керээниң ачызында бодунуң бичиизинде-ле бодап чораан күзелин боттандырып алган. Шугдуржап Сергеевич амданныг аъш-чем кылырынга дыка ынак. Ол кезээде кижилерге бир-ле буянныг чүүлдү кылырын күзеп чоруур.
Хлеб быжырар чер тургузуп алыр дээн күзелин ол мынчаар чугаалады:
— Чаа быжырган хлебтиң чаагай чыдын кажан-даа утпас мен. Куран арбанга чурттай бергеш-ле, хлеб быжырар чер ажыдып алыр бодап алган мен. Эгезинде чүгле арбанның чурттакчыларынга база чоок-кавыда суурларны хлеб-биле хандырар, оон чоорту ажыл-агыйымны улгаттырып, өске кожууннарже үндүр садар бодалдыг мен.
Шүгдүржап Сергеевич бодап алган сорулгазын кажан-даа соңгаарлатпас чаңчылдыг. Ынчангаш бодунуң ажыл-херээн ажыдып алыр дээш, бар-ла аргаларны ажыглап, күрүне деткимчезин алыр деп шиитпирлээн. Тес-Хем кожууннуң Чонну ажылга хараа тудар төвүнге барган. Төптүң директору Айлуна Дандаа аныяк сайгарлыкчының изиг күзелин деткээн. Шүгдүржап Сергеевич бизнес-төлевилелиниң орулгалыг болгаш чарыгдалдыг кезээн ажылдап кылгаш, комиссияга бизнес-планын таныштырган.
— Бодунуң ажыл-агыйын тургузуп шыдавайн чоруур хамаатыларга, ажыл-херээн эгелеп алырынга социал керээ дыка эки аргаларны берип турар-дыр. Чонну ажылга хаара тудар төптүң специалистеринге база комиссия кежигүннеринге бизнес-планымны тургузарынга, кандыг угланыышкын-биле ажылдаарымны айтып берип, деткимче көргүзүп турары дээш өөрүп четтиргенимни илередир-дир мен. Мындыг эки арганы ажыглавас аргазы чок – деп, аныяк сайгарлыкчы өөрүшкүзүн илеретти.
Аныяк сайгарлыкчы социал керээ-биле алган деткимче акшазынга амгы үениң технологтуг дериг-херекселин садып алган. Ол ам дээди сорттуң хлевин ийи аңгы хевирге база кондитер кылыгларын чаа дериг-херекселинде быжырып эгелээн.
Июнь 3-те Куранга дыка чараш байырлал болган — чаа пекарня ажыдыышкыны. Улуг ширээ долдур быжырган аъш-чемин делгээн, орус-тыва дылдарда «Хлеб-тараа — хүндүткелдиң ыдык чеми», «Хлеб — всему голова» дээн үлегер домактарны улуг баннерлерде аскан, өң-баазын шарларлыг байырланчыг шинчи-биле куранчылар аалчыларын уткуп алган.
Хлеб быжырыкчызы Шугдуржап Сергеевич бир дугаар быжырган хлевин аалчыларынга амзадып хүндүлээн. Келген аалчыларга Тес-Хемниң сураглыг «Куранның кырган-авалары» ансамбли солун концертин бараалгаткан. Аъш-чемниг, ажылгыр-кежээ Аракчааларның өг-бүлезин Кызылдан, Самагалдайдан, Эрзинден келген аалчылары алгап-мактап, суй белектерин сөңнээннер.
Социал керээниң ачызында Тес-Хем кожуунда база бир сайгарлыкчы немешкени ол.
/ Алдынай СОЯН.
Фото-чуруктарны хуу архивтен алган.
"Шын" №42 2023 чылдың июнь 10