Бөгүн, июнь 12-де, Сүбедей спорт өргээзинде 18 хардан 39 хар чедир командалар аразында хол бөмбүүнге түңнел оюннар чоруп турар.
Ам бо шакта эң-не шыырак эр, херээжен командалар аразында оюннар кидин түлүк. Тес-Хем болгаш Ак-Довурактың херээжен командаларының бирги чер дээш оюну изиг-изиг чоруп тур. Хол бөмбүүнге тулган ойнаар чалыы кыстарның чараш оюнун көрүкчүлер, аарыкчылар хей аът көдүрлүүшкүннүг көрүп турлар. Оларның аразында Тес-Хемниң чыынды командазының кежигүннери, хоочун спортчулар бар болду. Валентина Оюн, Айлаңмаа Соян, Мая Оюн, Саяна Балдан-оол, Чечек Бадарчы, Валентина Арапчор спартакиаданың хол бөмбүүнге эки түңнелдерлиг ойнааннар. Бо хоочуннар командазының чартык финалче киргени база эки көргүзүг-дүр. Ам аныяктар командазын деткип келгеннери бо. Олар улаштыр баскетбол маргылдаазынга база киржир.
Тес-Хемниң Берт-Даг, Ак-Эрик, Ү-Шынаа, О-Шынаа, Самагалдайдан келген эң-не тергиин ойнакчылардан тургустунган чыынды командазы 3 хонук дургузунда 16 команданы тиилээш, бөгүн бирги чер дээш ойнап турарлары бо.
Кожуунунуң адын төлептиг тудар дээш тергиин ойнап турар спортчу кыстар: капитаны Азияна Намдак, Олча Биче-оол, Хамнаарак Доржукай, Чойгана Биче-оол, Ролланда Саая, Олчана Шыырап, Алдынай Дукаа.
Аныяк спортчуларга тиилелгени күзеп каалы!