Чадаананың Максим Шалыевич Монгуш аттыг шыдыраа клувунга Тыва Республиканың шыдыраа маргылдаазының 1994 чылдың тиилекчизи, спорттуң хоочуну, Тыва Республиканың күш-культура болгаш спорттуң тергиини, спорт мастеринге кандидат Мөңгүн-оол Тюлюштуң 80 харлаан байырлалын таварыштыр хоочуннар аразынга шыдыраа маргылдаазын бедик деңнелге эрттирген. Ук маргылдаага киржири-биле республиканың эң-не шыырак спортчулары – 70 хардан өрү назылыг эр улус, 50 хардан өрү назы-харлыг херээжен ойнакчылар чедип кээп, күжүн шенешкеннер.
Маргылдааның байырлыг ажыдыышкынынга кожууннуң чагырга чериниң корум-чурум талазы-биле оралакчы даргазы Алаан Сат сөс ап, хоочун спортчуга чедиишкиннерни күзээш, хүндүлел бижикти, суй белекти сөңнээн. Башкының өөреникчизи Тимур Ховалыг тускай белекти база шыдыраачы дуңмалары Сергей Куулар, Мөңгүн-оол Куулар, Сергей Адыгжы олар байырын чедирип, хоочунну деткээннер. Херээжен спортчулар боттарының мурнундан хоочунга хүндүткелди көргүзүп, бо сайзыраңгай үениң чараш көрүштүг телефонун байырлыг байдалга тывысканы онза болду.
Маргылдааның кол шииткекчизи Тимур Ховалыг оюннуң кол дүрүмнерин тайылбырлааш, ойнакчыларга чедиишкиннерни күзээн. 7 салымныг бир хүн үргүлчүлээн маргылдаага кымга-даа уттурбайн, хоочун шыдыраачы Сергей Шириндивиевич Куулар тиилеп каан. Ийиги черни Алёк Монгуш (Абакан хоорай), үшкү черни Алдын-оол Сундуй (Чадаана) тус-тузунда үлешкеннер.
Херээжен ойнакчылар аразынга чидиг демиселдиң түңнелинде 1-ги черни Алла Кенден (Чаа-Хөл), 2 дугаарын Айлаана Монгуш (Кызыл), 3-кү черни Светлана Ондар (Теве-Хая) олар чаалап алганнар.
Маргылдааның тиилекчилеринге тыва хүрешти бедик деңнелде сайзырадып чоруур хүндүлүг хоочунувус Владимир Комбуй-оолович Монгуш бодунуң өмүнээзинден хүндүлел бижиктерни, медальдарны база акша шаңналдарын байырлыг байдалга тывыспышаан, оларның хей-аъдын көдүрүп деткээн. «Эң хоочун назылыг» ойнакчылар Анастасия Дур-ооловна Күжүгет болгаш Савин Санчат-оолович Ондарга база хүндүлел бижиктерни тывыскан.
Маргылдааның бедик деңнелге эрткенинге хоочун шыдыраачы Мөңгүн-оол Дарын-оолович сеткилинден өөрүп, ойнакчыларга четтиргенин илередип, чедиишкиннерни күзээн.
Тимур ХОВАЛЫГ, тренер башкы.
Чурукту маадырның архивинден алган.
“Шын” №37 2026 чылдың сентябрь 24
"Шын" солуннуң МАХ-каналынга каттыжыңар: max.ru/channel_shyn