Сүт-Хөл кожууннуң Суг-Аксы суурга июнь 12-де күш-ажыл болгаш спорттуң хоочуну Александр Дудан-оолович Ондарның 65 харлаан байырлалында дүрген шыдыраага республика чергелиг маргылдаа бедик деңнелге эрткен.
Маргылдааны швейцарь дүрүм ёзугаар 15-15 минутага 7 оюнну ийи бөлүкке – 30 хардан 55 хар чедир назылыг шыырак ойнакчылар база 55 хардан өрү назылыг хоочуннар аразынга эрттирген. Хоочуннар аразынга эп-найыралды, кадыкшылды база шыдырааны сайзырадыр сорулга-биле маргылдааны эрттирген.
Нарын болгаш дүрген оюннарның түңнелинде дараазында спортчулар тергиидээн: 30 хар чедир ойнакчылар аразынга 1-ги черни Долаан Салчак 7 оюндан 6,5 санны ап, 1-ги черже үнген, 2–3-кү черлерни 5,5 санныг Херел Сандай-оол база 5,0 санныг Адыгжы Куулар алганнар (шупту Кызыл хоорайның төлээлери); 55 хардан өрү назылыг 30 хоочун аразынга чидиг оюннарның түңнелинде 7 оюндан 6 санны алгаш, 1-ги черже Улуг-Хемниң төлээзи Мерген Анай-оол үнген, 2–3-кү черлерни 5,5 саннарлыг Чадаанадан республиканың 3 дакпыр чемпиону Орлан Сарыглар база Барыын-Хемчиктен Эдуард Агбаан алганнар; хоочуннар аразынга Сүт-Хөлден 90 хар чоокшулап олурар күш-ажылдың база спорттуң хоочуну Карбы Допурович Ондар 10 дугаар черни алган.
Шаңналче кирген шыдыраачылар юбилярның болгаш деткикчилерниң, Сүт-Хөл кожууннуң чагыргазының база Шыдыраа чөвүлелиниң даргазы Анатолий Сарыгларның холундан кубокту, хүндүлел бижиктерни, медальдарны база акша шаңналдарын алганнар.
Алексей ЧАМБАЛ-ООЛ, спорттуң хоочуну.
Чуруктарны авторнуң архивинден алган.
“Шын” №27 2025 чылдың июль 17