Эъди изээн, ишти аараан 10 хардан 17 харга чедир назылыг 31 уругну республиканың халдавырлыг аарыглар эмнелгезинге эккелген. Баш удур тодаратканы болза, «Чагытай» лагериниң 1 дугаар сезонунга дыштангаш, чанып келген уруглар болган.
Республиканың халдавырлыг аарыглар эмнелгезиниң кол эмчизиниң оралакчызы Чечек Ондарның медеглээни-биле алырга, уругларны эмнеп, чогуур медицина хемчеглерин чорудуп эгелээн. Хораннанган уругларның байдалы аңгы-аңгы. Бир назы четпээн уруг реанимацияда, үжү бажыңында эмненип турар.
ТР-ниң Баштыңы Владислав Ховалыг ук байдалды онза кичээнгейге алгаш, хайгааралдар болгаш эрге-хоойлу органнары-биле кады «Чагытай» уруглар лагеринге чогуур хыналданы чорудар дугайында даалганы ТР-ниң Кадык камгалал яамызынга берген. Тываның өске-даа бичии уруглар лагерьлеринче хыналдалыг үнүүшкүннерни кылыр дугайында ТР-ниң Баштыңы оралакчыларынга сагындырган. Ук байдалга хамаарышкан айтырыгларны ТР-ниң Чазааның Даргазының оралакчызы Орлан Сарыглар харыылап турар.
Росхереглелхайгаарал болгаш Эпидемиология болгаш гигиена төвү эпидемиологтуг истелгени (шинчилгени) чорудуп эгелээн. Амгы үеде лагерьниң 1 дугаар сезонунга ажылдап турган болгаш оларның-биле харылзажып турган улустуң шуптузундан анализ алыр ажылдарны чорудуп эгелээн. Аъш-чемден болгаш ону шыгжаар черлерден база анализтерни алган.
А. ОНДАР белеткээн.
“Шын” №51 2024 чылдың июль 10