Угаадыглыг чугаа
Бир-ле катап Будда Бурган черде хөөп каан эртинелиг шыгжамыр тып алган чүве-дир оң. Көвей эртине даштарлыг доңга болган. Өөреникчизи Анандыдан Будда Башкы айтырып-тыр:
— Бо хоранныг чыланны көрүп тур сен бе?
— Көрүп тур мен — деп, Ананды харыылаан.
Ол чугааны оларның чанынга эртип чыткан бир кижи дыңнап каан чүве-дир. Ында чыткан чыланны көөр дээш, ол бүдүү чоокшулап келген. Чылан орнунга эртине даштарлыг доңганы көрүп кааш, ол дыка кайгаан-дыр — ындыг кайгамчык эртинелерни канчап чылан деп адап турар чоор? Ол кижи демги эртине даштарлыг доңганы бүдүү бодунга ап алган чүве-дир. Ооң соонда ол кижи ажыл-агый-даа, бодаар-сактыр чүве-даа чок чыргалдыг чурттап чораан чүве-дир оң. Хаанның эртинелиг шыгжамырын тып алгаш, бодунга бүдүү кадагалап, хаанынга хүлээдип бербейн чоруурун улус дыңнаткан-дыр. Хаан-даа чүү боор, ол эртинелиг шыгжамыр тыпкан кижини кыйгырткаш, байысаап эгелээн-дир. Ынчалза-даа хаанның албатылары кандыг-даа эрээ-шаажы-биле ол кижини буруузун билиндирип чадап каан. Хаан ол хөөкүйнүң бажын одуруп шаажылаар деп чарлык үндүрген. Шаажылал черинче бар чыткаш, ол кижи мындыг сөстер эткен-дир:
— Хоранныг чылан дугайында Будда Бурганның сөзүн ам-на билдим…
У.Д. ДОНГАК очулдурган.
«Сарыг шажынның угаадыглыг чугаалары» деп номдан алган.
Чурукту интернеттен хоолгалаан.
«Шын» №20 от 2025 чылдың май 29