Орёл хоорайга сентябрь 25–26 хүннеринде дыңнаары кошкак 14–15 харлыг оолдар аразынга команда талазы-биле Россияның бирги чери дээш хостуг хүрешке 12 аңгы командалар аразында адааннашканнар.
Ук маргылдаага бистиң республикадан кадыкшылдың харык-шинээнге таарыштырган спортчу хевирлериниң спорт школазының тренер башкылары Артыш Доржу, Кирилл Багай-оол, Аржаан Ооржак оларның белеткээн командазы киржип, тиилекчи атка төлептиг болганнар. Тывадан киришкен элээди оолдарның тиилелгези бистиң республикада команда талазы-биле төөгүлүг чедиишкин болган.
Маргылдаага хүрештиң эң-не шилиндек мөгелер чурту болур Дагестанның командазы 2-ги черни, Астрахань облазының командазы 3-кү черни тус-тузунда алганнар. Тываны төлээлеп киришкен мөгелерден 38 килге Ачылыг Монгуш, 44 килге Сайын Соян, 48 килге Начын Кара-Сал, 85 килге Александр Баринов 1-ги черлерни, 52 килге Түлүш Доржу, 62 килге Намзырай Чадамба 2-ги черлерни тус-тузунда чаалап алганнар. Чайынналчак чедиишкинниг чанып келген бичии мөгелеривиске, оларның тренер башкыларынга ол ышкаш спорт школаның удуртулгазынга изиг байырны чедирип, моон-даа соңгаар хөй-хөй спортчу чедиишкиннерни күзедивис.
/ А.ЧАМБАЛ-ООЛ.
“Шын” №76 2024 чылдың октябрь 5