Буурул баштыг Саяннарның сиртери дег шөйлү берген чуртталгада хөй-ле харлар эрип калды, хөй-ле хемнер ага берди, хөй-ле ак халаттыгларны көрүп келдим.
Ортумак сынныг, чазык-чараш арынныг, хоюг үннүг эмчи Республиканың 2 дугаар эмнелгезинде ажылдап турар. (Эмнелгениң чон ортузунда ады “Малчыннар эмчизи”). Ол палатага кирип кээрге, өрээл ишти чырый берген ышкаш болур.
Кымыл ол? Ол дээрге Алдынсай Сургуул-ооловна-дыр. Иммунолог-аллерголог эмчи. Аарыг кижиниң диагнозун шын тургузуп билири. Ол эмнээшкинниң дээштиг, шынарлыын херек кырында бодумга көргеш, магадап ханмадым. Алдынсай Сургуул-ооловнаның аарыг улус-биле харылзажыры, чугаалажыры бир янзы, ында буу-хаа далаш чүве чок. Аарыгның канчаар өөскүп келирин, канчаар демисежирин артык сөс чок, тода болгаш билдингир дорту-биле чугаалап бээр чорду.
Аарыг улусту хайгаарап кээрде, кижиниң картазын (история болезни) тудуп алгаш кээр. Дужааган анализтериниң харыызын далаш чок тайылбырлап бээр. Бо чүүлүмнүң үстүнде “хөй-ле ак халаттыгларны” көрген мен деп турарымда ужур-ла бар. Эмчилерниң хөй кезии анализтерни “ажырбас”, “эки”, “ортумак”, “багай” деп ниити сөстер-биле чугаалаар боор чүве. А бо эмнеп турган эмчиден бичии-даа ниити сөстер дыңнавадым.
Ол хамаанчок аарыг кижиниң сагыш-сеткил талазы-биле ундарап, чааскаанзырап турарын безин эскерип каар эмчи чорду. Бо эмнелгеге мээң-биле кады күш-ажылдың хоочуннары Д.Х. Хирбаа, Ч.Х. Аңгыр-оол, А.Ч. Ооржак, Л.И. Машковцева олар база эмнедип чыткан. “Хостуг үеңерде чугаалажып туруңар” деп, Алдынсай Сургуул-ооловна биске чугаалап турду.
Черле ынчаш бо эмнелгениң арыг-силиин, аъш-чеминиң шынарлыын кижи дораан эскерип каар. Эмчи сестраларының эвилең-ээлдээн, арыг-силиг харыылап турар уругларның шалыпкын-кежээзин ында чыдар улус магададывыс.
Эмнелгеге бо бүгү чогумчалыг байдалды уштап-баштап, чогуур бедик деңнелде тудуп турар кижи эмнелгениң эргелекчизи — Айдана Анатольевна Монгуш. Ында аарыг улустуң аразында кандыг кижи чок дээр. Ылап-ла “хоочун коктуг, хола кактыг” деп кижилер ында боор-дур.
Ынчангаш мен бо таварылгада ховар эмчи Алдынсай Сургуул-ооловнага таварышканым “мээң аксым-кежии” деп санаар-дыр мен.
Эптиг-демниг, найыралдыг коллективти удуртуп-баштап турары дээш, Айдана Анатольевнага мөгейип, четтиргенивис илередип тур бис. Эрте берген-даа болза, профессионал байырлалыңар-биле Силерге узун назынны, чалгынныг өөрүшкүнү, каң дег быжыг бүзүрелди О.Л.-С. Салчак, Д.Х. Хирбаа, Ч.Х. Аңгыр-оол, А.Ч. Ооржак, Л.И. Машковцева күзеп тур бис.
/ Оскал-оол САЛЧАК, күш-ажылдың хоочуну.
“Шын” №26 2026 чылдың июль 9
"Шын" солуннуң МАХ-каналынга каттыжыңар: max.ru/join/egenQ...