Октябрь 20-де Тываның Кадык камгалалының сайыды Анатолий Югай кадык камгалалының хүндүлүг хоочуну, сураглыг хирург Валерий Самбылдаевич Ховалыгның 70 харлаан юбилейи-биле байыр чедиргеш, “Хүндүлүг дагдыныкчы” деп Кадык камгалал яамызының хөрек демдээн байырлыг байдалга тывыскан.
Валерий Ховалыг республикада салым-чаяанныг хирург эмчи деп шагда-ла билдингир апарган. Ол дээди категорияның эмчизи болурундан аңгыда, район деңнелдиг ажылдап тургаш-ла, кезиишкинниң эң-не нарын хевирлерин кылып чорудуп турган.
Сүт-Хөл, Чөөн-Хемчик кожуун эмнелгелеринге ажылдап турган үелеринде дуржулгалыг удуртукчу кезиишкин кылырда, чугула херек чаа үениң аппаратуразын салдырарынга улуг рольду ойнап, чедип ап турган. 1988 чылда Валерий Самбылдаевич Республиканың онкодиспансеринге хирург-онколог кылдыр ажылдааш, 1992 чылда Республиканың 1 дугаар эмнелгезиниң кол эмчиниң хирургия талазы-биле оралакчызы болуп база ажылдап турган.
Ооң бүгү күжүн, эртем-билиин республиканың хирургия албанының сайзыралынче киирип турганының бадыткалы – Республиканың 1 дугаар эмнелгезиниң баазазынга бурунгаар депшилгелиг аргаларны ажыглап кииргени болур. 1999 чылда ооң идепкейлиг киржилгези-биле ол эмнелгеге ириңниг хирургияның салбырын ажыткан.
Валерий Самбылдаевич тулган хирург болурундан аңгыда, хөй-ниитижи ажылдарга база идепкейлиг болганындан Дээди Хуралдың Төлээлекчилер палатазының депутадынга, 2004 чылда Тыва Республикада ЫМК-ның (ОМС) девискээр фондузунуң баштаар чериниң даргазынга база соңгуттуруп турган.
2002 чылдың декабрьда Валерий Самбылдаевич Тыва Республиканың Кадык камгалалының оралакчы сайыдынга томуйлаткан. 2004 – 2005 чылдарда республиканың кадык камгалал сайыдының хүлээлгезин күүсетпишаан, Хай-халап медициназының девискээр төвүн, Республиканың нефрология төвүн организастаан. 2009 чылда Кызылдың хоорай поликлиниказының улуг эмчизинге томуйлаткан.
Ховар салым-чаяанныг хирург Валерий Самбылдаевич Ховалыгның республиканың кадык камгалалының сайзыралынга киирген үлүг-хуузу улуг. Шудургу ажылы дээш эмчи “Тыва Республиканың кадык камгалалының алдарлыг ажылдакчызы” деп бедик ат-биле болгаш Россияның Кадык камгалал яамызының “Кадык камгалалының тергиини” хөрек демдээ-биле шаңнадып турган.
К. Монгуш
ТР-ниң Кадык камгалал яамызының медээзи-биле.