Ховар номнар делгеттинген

Февраль 3-те Алдан-Маадыр аттыг Национал музейге “Культпросвет” аттыг ном байырлалы азы 2020 – 2022 чылдарда республиканың уран чүүл болгаш культура адырында чырыкче парлап үндүрген чаа ном-сеткүүлдер, эртем ажылдары, төөгүлүг болгаш уран-чечен номнарның түңнелдерин үндүрген.

Ол хүн ниитизи-биле барык 130 парлалга үндүрүлгелерин делгээн. Оларның 40 хуузу – уран-чечен чогаал, 31 хуузу – өөредилге номнары, 29 хуузу эртем болгаш төөгүге хамаарышкан.

Шупту делгеттинген ажылдар чүгле культура албан организацияларынга эвес, а бүгү ниитилелге, өзүп олурар салгалга культурлуг өнчүнү кадагалап арттырып бээринге ажыктыг болуп турар. Ылаңгыя төөгүге хамаарышкан архив материалдары чыгдынган номнардан кончуг солун барымдааларны билип ап болур.

“Бистиң хөй талалыг адырывыста база бир кол черни ном-сеткүүл үндүрүлгези ээлеп турар. Бо талазы-биле күжениишкинниг ажылдаанының түңнелинде, хөй, ажыктыг, солун болгаш харын-даа ховар литература мында чыгдынганын көрүп тур бис. Ынчангаш эки түңнелдерлиг ажылдаан культура албан черлериниң ажылдакчыларынга байыр чедирип, бо талазы-биле ажылын ам-даа уламчылаарын күзедим” – деп, ТР-ниң культура сайыды Виктор Чигжит чугаалаан.

Болган фестивальга республиканың культура албан черлериниң үндүргени эң дээре номнары, грантылар деткимчези-биле боттандырган төлевилелдери дээш ТР-ниң Культура яамызының шаңналын тус-тузунда тывыскан.

Ховар делгелге Алдан-Маадыр аттыг Национал музейге февраль 7-ге чедир уламчылаан. Ынчалдыр ТР-ниң Культура яамызы эрткен чылдың түңнелдериниң 2-ги блогун дооскан. Бирги блок январь 27-де республикада улусчу чогаадылга коллективтериниң ажылын түңнээн.

Түңнелинде, 3-кү блок февраль 15-те Кызылдың А.Б. Чыргал-оол аттыг уран чүүл колледжинге салым-чаяанныг аныяктарны, янзы-бүрү мөөрейлерниң лауреаттарын, профессионал мөөрейлерниң тиилекчилерин илередир хемчег болуру манаттынып турар.