Чолаачы шынзылгазыныӊ хуусаазы 2024–2025 чылда төнер турган болза, чаа дүрүм-биле ооӊ хуусаазы 3 чыл соӊгаарлай бээр.
Россия Федерациязыныӊ Чазааныӊ 2023 чылдыӊ декабрь 23-те үнген 2269 дугаарлыг доктаалы ёзугаар чолаачыларныӊ шынзылгазыныӊ хуусаазы узай бээр. Ынчангаш бо чоокку үш чыл дургузунда транспорт башкарар чолаачыныӊ эргезин катап кылдырар дээш сагыш човавас болза ажырбас.
Ооӊ мурнунда 2022 чылдыӊ январь 1-ден тура 2023 чылдыӊ декабрь 31-ге чедир хуусаалыг чолаачы шынзылгазын база үш чылга узаткан. Ам 2025 чылдыӊ декабрь 31-ге чедир хуусаалыг чолаачы шынзылгаларын база шак ынчаар автоматчыткан чурум-биле узадыр.
Чижээ, шынзылгазыныӊ хуусаазы 2025 чылдыӊ январь 1-ге чедер турган болза, ам чогуур документилерни чүгле 2028 чылдыӊ январь 1-ге чедир дужаар.
Автоматчыткан чурум-биле чүгле Россияныӊ чолаачыларыныӊ шынзылгазын узадып турар. Бир эвес хуу автомашиназы-биле даштыкы күрүнеже баар апарза, ол чурттуӊ консулствозунга баргаш, херек медээлерни билип алыр ужуруг.
Чолаачыларныӊ автотранспорт башкарар эргелиг шынзылгазыныӊ хуусаазы келирге-ле, ооӊ хөй кезиин узадып турар дээрзин Россияныӊ ИХЯ-зы айыткан. Ынчангаш бо чоокку үш чылда оларныӊ транспорт башкарарынга ол талазы-биле шаптык турбас. Бо медээге хамаарыштыр тайылбыр херек апарза, чурттап турар регионунда Күрүне автоинспекциязынга баргаш, билип алыр.
Тыва Республиканыӊ ИХЯ-ныӊ Күрүне автоинспекциязыныӊ медээлеринден.