“Ада-чурт камгалакчылары” деп Күрүне фондузу тускай шериг операциязынга хамаарышкан айтырыгларны чаңгыс черде мөөңнеп, ТШО киржикчилери дайынчылар болгаш оларның өг-бүлелеринге бүгү-ле хереглеттинип турар дузаны чедирип, оларның шиитпирлеп шыдавайн турар айтырыгларын шиитпирлежип, ажылды хүннүң-не чорудуп турар.
Ылаңгыя ТШО киржикчилериниң аразында ис чок читкен, туттурган болгаш чок болган деп билдинип-даа турза, мөчүзү дайын шөлүнде хевээр арткан дайынчыларның дөргүл-төрелдери-биле дорт ажылдаар “Идегел” деп коммерциялыг эвес организация Фондуда 2023 чылдың октябрь айдан тура ажылдап эгелээн.
Ооң директору болурундан аңгыда, Күрфондуда социал координатор болуп Мира Балчый айтырыглыг келген улус-биле эп-чөп чугаалажып, читкен улусту дилежип, оларның өг-бүлелеринге кандыг дуза хереглеттинип турарын хайгааралда ап, доктаамал харылзаазын үспейн ажылды чорудуп турар.
Февраль 26-да ыраккы Мөңгүн-Тайганың Мөген-Бүренден ава Уран Иргит аңаа киргеш, тургустунуп келген айтырыын канчаар шиитпирлээрин, каяа, кандыг бижик киирерин билип алган. Чүл дизе, Уран Делгер-ооловнаның улуг оглу Шаанак Иргит ТШО-нуң эгезинден тура киришкеш, 2023 чылдың ноябрь айда дайын шөлүнге чок болган. Ам бо хүнде ооң акша шилчиир картазындан билдинмес улус удаа-дараа акшазын уштуп туруп берген. Бо талазы-биле айтырыгны шиитпирлежири-биле, бир дугаарында, ТР-ниң ИХЯ-га барып дораан билдириишкин бижиирин Мира Павловна авага сүмелээн. Ол-ла дораан Уран Делгер-ооловна ТР-ниң ИХЯ-га четкеш, билдириишкинни канчаар бижиирин, чүнү айтырын билип алган.
ТШО киржикчизи Шаанак Иргиттиң авазынга, ха-дуңма, дөргүл-төрелдеринге мынчага чедир база бир берге болуп арткан айтырыг – дайынчының мөчүзүн ам-даа албааны. Дайынчының мөчүзү тывылбаанда, ону ис чок читкен деп шериг хоойлузу ёзугаар ынчаар айтыр ужурлуг болуп турар. Херек кырында Шаанактың аттырыпканын көрген эжи Уран Делгер-ооловнага оглунуң идик-хевин хүлээдип кээп чорааш, чугаалаан. Чок болган дайынчының чыдар девискээрин российжи солдаттар кажан хостаптарга, чүгле ынчан алдынар дээн харыыны ава каш удаа дыңнаан. Шыдавыже манавышаан...
Манаашкын үезинде аваның сагыш-сеткилин бичии-даа болза оожургадып, кадыын быжыктырары-биле үстүнде адаанывыс фондунуң ажылдакчылары Уран Делгер-ооловнага “Серебрянка” санаторийге февраль ортан үезинде дыштанып алыр путевканы берген.
“Санаторийге эки дыштангаш, февраль 19-та чанып келдим. Ол ышкаш халас концерт көөр арганы база фондунуң ажылдакчылары берген. Ол дээш четтирдим. Ам бөгүнде шиитпирлексээн айтырыым ужур-утказы билдине берди. Оглум Өвээнчи улаштыр шиитпирлежиптер боор. Мен Мөген-Бүренче чанар машина манадып алган мен. Орук-суурда хар-чам, хөртүк улуг болгаш машиналар ынаар дистинчип алгаш чоруур. Эртежик үнер дээн улусту саададыпкаш, далажы бердим” – дээш, ол Мөңгүн-Тайгазынче аъттаныпкан.
Карина МОНГУШ.
Чурукту интернеттен алган.
“Шын” №15 2024 чылдың февраль 28