Республиканың эмнелге албан черлеринче “Идепкейлиг узун назын” деп чаа национал төлевилел-биле чаа дериг-херекселдер кээп эгелээн.
Регионнуң эндокринология төвүнге бедик технологиялыг 12 дериг-херекселди дамчыдып берген. Чаа дериг-херексел иштики бестер аарыгларының салдарындан тывылган карак аарыгларының берге байдалдарын шинчиир болгаш эмнээр деңнелин бедидер аргалыг. Ооң мурнунда хөй-ле кижилер республикадан дашкаар эмчилеп чоруп турган. Бо чоокку үеде республиканың специалистери каданнаан катаракта (карак огунуң шырыңмаланыры) болгаш глаукоманы боттары эмнеп эгелей бээр.
Каа-Хем кожууннуң төп эмнелгези бистиң чуртка бүдүрген “РуСкан” деп чаа хевирниң ультра-үн-биле ажылдаар сканерин алган. Ол аңгы-аңгы талаларындан шинчилгени чорудуп, аарыгларны тода көрүптер аргалыг хөй талалыг УЗИ-сканер болуп турар. Чүгле бир ай дургузунда бо чаа аппаратка 128 аарыг улус шинчилгени эрткен. Улуг-Хемде болгаш Чөөн-Хемчикте кожууннар аразында медицина төптери билинместедир эмниң кайы хире дээп турарын тодарадыр мониторларны алган.
2025 чылда “Идепкейлиг узун назын” национал төлевилелдиң ачызында республикага ниитизи-биле 179 амгы үениң медицина дериг-херексели келир. Кожууннарның төп эмнелгелеринден эгелээш фельдшер-акушер пунктуларынга чедир эмнелгелерге чаартылгалар болур. Ол бүгү-ле кожууннарда чурттакчы чонга элээн тодаргай шинчилгени болгаш шынарлыг эмнээшкинни чедирер.
Чыжыргана СААЯ белеткээн.
Чуруктар Кадык камгалал яамызының соцчеткизинден.
“Шын” №13 2025 чылдың апрель 10