Бо чылын Социал фондунуң ТР-де салбыры ие капиталының акша-хөреңгизи-биле уругларның өөредилгезин төлээри-биле киирген 184 билдириишкинге чөпшээрелди берген. Ындыг сорулгаларны боттандырарынче 10 млн. ажыг рубльди угландырган.
Ажы-төлдүң өөредилгези дээрге ие капиталын ажыглаарының база бир нептереңгей угланыышкыны. 2007 чылда, программаның ажылдап келген үезинден эгелээш, Тывадан 2921 өг-бүле ниитизи-биле 122,9 миллион ажыг рубльди уругларының өөредилгезинче шилчиткен.
Ие капиталын уруглар садынче азы школа кирер мурнунда өөредилге программаларынче сертификатты алган уруг төрүттүнүп келирге-ле дораан киирип болур. Кол болгаш немелде өөредилге программаларынче уруг чүгле 3 харлапкан соонда киирип болур. Кандыг-даа таварылгада өг-бүлениң кайы-даа уруунга сертификатты ажыглап болур. Уругнуң өөренип эгелээн үези 25 хардан улгатпас ужурлуг.
Акша-хөреңгини шилчидер албан чери азы сайгарлыкчы Россияның девискээринде болгаш өөредилге төлевирлери чорудар чөпшээрел бижиктиг болуру албан. Ие капиталының акша-хөреңгизин өөредилгеден аңгыда уругну азырап, хайгаараарынче, ажаап-тежээринче база угландырып болур. Ол ышкаш уругнуң өөренип турар үезинде ниити чуртталга бажыңынга чурттаар черин болгаш коммуналдыг төлевирлерин база төлеп болур.
Ие капиталын ажыглаар дугайында билдириишкинни Күрүне ачы-дузазының порталынче азы Социал фондунуң сайтызында хууда кабинетче, оон ыңай Россияның Социал фондуларында чон хүлээр албан черлеринге азы Хөй ажыл-чорудулгалыг төптерниң офистеринге киирип болур.
Россияның Социал фондузунуң ТР-де салбырының телефону: 8-800-200-0543. Ажыл хүннеринде эртенгиниң 09:00 шактан кежээкиниң 18:00 шакка чедир ажылдаар.
Ч. СААЯ белеткээн.