Россияның Социал фондузунуң регионалдыг салбыры 2025 чылдың баштайгы сес айларында ажыл-чорудулгазының дугайында республиканың Чазаанче киирген отчёдунда ие капиталының акша-хөреңгизин ажыглаанының дугайында медээлерни айыткан. Ие капиталы – Россияның өг-бүлелеринге «Өг-бүле» национал төлевилел күүселдези-биле боттандырган күрүне деткимчези болур.
Россияның Социал фондузунуң Тывада салбырының начальниги Часкал Дарааның дыңнатканы-биле алырга, Тывада ие капиталының сертификадын чыл эгезинден бээр 1375 чурттакчы алган, оларның 1203-ү Күрүне ачы-дузазының порталын таварыштыр документилеринге бадыткалды алган. 2025 чылдың сес айларында 4882 өг-бүлеже ие капиталының акша-хөреңгизин шилчиткен. Ие капиталының алыкчыларының 54 хире хуузу оларны ай санының уруглар төлевири кылдыр ажыглаарын шилип алган.
Ие капиталының акша-хөреңгизиниң ийиги эң нептереңгей ажыглалы – чуртталга байдалын экижидери, ону 1433 өг-бүле шилип алган, азы ие капиталын алыр эргелиг өг-бүлелерниң 29,4 хуузу. 426 өг-бүле азы алыкчыларның 8,7 хуузу ие капиталының акша-хөреңгизин ажы-төлүнүң өөредилгезинге ажыглаан.
Федералдыг ие капиталының акша-хөреңгизин элээн каш сорулгаларга ажыглап болурун сагындыраал. Бирээде, оларны чуртталга байдалын экижидеринче, чижээ, бажың садып алырынга азы тударынга, ооң иштинде ипотека төлевирлеринге ажыглап болур. Ие капиталының акша-хөреңгизи-биле лицензиялыг уруглар садтарынга, колледжтерге болгаш дээди өөредилге черлеринге уругларының өөредилгези дээш төлеп болур. Инвалид уругларның ниитилелче киреринге дузалаар тускай даңзыдан барааннар болгаш ачы-дузалар чарыгдалдарын эгидеринге ие капиталын ажыглап болур.
Ол ышкаш ие капиталының акша-хөреңгизин эвээш орулгалыг өг-бүлелерге үш хар чедир уругларының ай санында төлевири кылдыр бээр арга база бар.
Бир эвес ие капиталындан арткан акша 10 муң рубльдан ашпас болза, ада-иениң бирээзиниң чыылдалыг пенсиязынче шилчидер ийикпе, азы чаңгыс катап төлээр төлевир кылдыр ажыглап болур.
Бистиң корр.
Чурукту интернет четкизинден хоолгалаан.
“Шын” №38 2025 чылдың октябрь 2