Ийи автомобильди хүлээткен

Улусчу фронтунуң эгелээни «Бүгү чүүлдү тиилелгеже!» деп федералдыг акция уламчылавышаан. Июнь 5-те Чер мелиорациязының болгаш көдээ ажыл-агыйны суг-биле хандырарының талазы-биле Тыва Республикада эргелели ийи автомобильди Улусчу фронтунуң төлээлеринге хүлээткен.

55-ки гвардейжи мото-адыгжы (даг) бригаданың дайынчыларынче ийи автомобильди Улусу фронт таварыштыр чорудуп турын Чер мелиорациязының болгаш көдээ ажыл-агыйны суг-биле хандырарының талазы-биле Тыва Республикада эргелелиниң директору Владимир Белобородов чугаалаан:

— Төрээн чуртувус Россияның шериглери тускай шериг операциязындан тиилелгелиг чанып келзин дээш, «Бүгү чүүлдү тиилелгеже!» деп федералдыг акцияга киржип, «УАЗ» болгаш «Газель» деп пассажирлер сөөртүр ийи автомобильди дузаламчыга берип турарывыс бо. «УАЗ»-ты 1980 чылда үндүрген, а «Газель» 2000 чылдың. Ийи автомобиль кайызы-даа ажылдап турар. Ооң мурнунда гуманитарлыг дуза чыылдазынга киришпейн турган бис, бо бир дугаар киржип тур бис. Дайынчы хөделиишкиннер үезинде чаңгыс чер чурттугларывыска ажыын көргүзер-ле болзунам! Кайызы-даа техниктиг шинчилелди эрткен. Үндүрген чылы эрги-даа болза, байдалын «4» деп демдекке үнелеп болур.

Россияның улусчу фронтузунуң регионда күүсекчи комитединиң даргазы Саима Далчин гуманитарлыг чүъктү удаа-дараа чорудуп турарын тайылбырлаан: «Аңгы-аңгы организациялардан болгаш хавырткан машиналарны тускай шериг операциязынче чорудары-биле, ээлчеглиг чүъктү чыып белеткей бердивис. Республиканың чурттакчы чонун, аңгы-аңгы организацияларын гуманитарлыг дузаламчы чыылдазынга катчып, деткимчени көргүзеринче кыйгырып тур бис. Орук чок ховуларга халдыр, бедик автомобильдерни-даа, чиик-даа машиналарны, мотоциклдерни, квадроциклдерни-даа дайынчы хөделиишкиннер девискээринче чорудары-биле хүлээр бис.

ТШО-да киржип турар чаңгыс чер чурттугларывыс улусчу фронтуже чагыгларны удаа-дараа киирип турар. Ылаңгыя чылыг үеде квадроциклдер, мотоциклдер оларга кончуг херек. Чайгы чылыг үеде болдунар-ла шаа-биле хөй техника чорудары планда көрдүнген. Компания “РЖД" партнёрувустуң дузазы-биле ТШО-же чүъктү удаа-дараа чорудар аргалыг апарган бис».

Тускай шериг операциязында киржип турар дайынчыларга ачы-дуза чыыр пунктулар дараазында адресте ажылдап турар: Кызыл хоорай, Тыва эки турачылар кудумчузу, бажың 3, каб. 3, харылзажыр телефон: 8 (39422) 2-10-50; Кызыл партизаннар кудумчузу, бажың 30, каб. 106.

Айдың ОНДАР.
Ада ТЮЛЮШТУҢ тырттырган чуруктары

«Шын» №42 2024 чылдың июнь 8