Хар чаап турган. Хат чок агаарга харжыгаштар бөөлденмишаан, черже аяар оожум бадып турганнар.
Кожа бадып чыткан ийи харжыгаш аразында чугаалажы бергеннер. Олар бот-боттарын чидиржиринден корткаш, холдарындан туттунчупканнар. Бирээзи хөглүг чугааланган:
— Ужугарга онзазын!
— Бис ужугуп эвес, бадып турарывыс ол-дур – деп, ийи дугаары муңгаргай харыылаан.
— Удавас чер-биле ужуражы бергеш, хоюг ак чоорган кылдыр хуула бээр бис!
— Чок, өлүмче бар чыдарывыс ол-дур, черге бисти чуура базып кааптар.
— Бис дамырактар апаргаш, далайже углаптар бис. Бис мөңге чурттаар бис! — деп, бир дугаар харжыгаш чугаалаан.
— Чок, бис эрээш, кезээ шагда эстип чиде бээр бис — деп, ийигизи удурланган.
Адак сөөлүнде маргыжары бужурганчыг апарган. Олар холдарын салдынчыпкаш, боттарының шилип алган салымынче уткуй ужупканнар.
Кожалар болгаш хар
Ийи кожа чурттап турган. Кыш-даа дүшкен, кылын хар чаапкан. Бирги кожа хүүрээн туткаш, бажыңының даштында харны аштап эгелээн. Аштанмышаан, кожазының девискээрин көөрге, дыка таптыг дескилей аштап каан орукчугаш бар болган.
Дараазында хүн база-ла хар дүжүпкен. Бирги кожа чартык шак бурунгаар хар аштаар дээш, үнүп келгеш көөрге, кожазының бажыңынче дургаар ам база орукчугаш.
Үш дугаар хүн дискек чедир хар чаапкан. Бир дугаар кожа кымны-даа мурнай тура халааш, аштанып кирипкен. А кожазында база-ла — дески орук!
Ол-ла хүн ийи кожа кудумчуга ужуражы бергеш, ол-бо деп чугаалашканнар-дыр. Чугаа кадында душ бооп ол айтырган:
— Сен чогум кажан харың аштап четтигип турар кижи сен, кожам?
Кожазы баштай элдепсине бергеш, оон каттырган:
— Ча, кажан-даа аштавас кижи мен. Менче эш-өөрүм кылаштажып кээп турар чүве-диин!
«Шын» №1 2025 чылдың январь 16