«Сени көөрге, харааданчыг-дыр» — деп, чаңгыс-даа кывыспаан чаа лаа хып турар эжинге чугаалаан. «Амыдыралың көңгүс кыска. Үргүлчү хып-ла турар, удавас төндүр өрттенип каар сен. Сеңээ бодаарга, мен аас-кежиктиг-дир мен. Хыппайн, эривейн, таваар чыдар-дыр мен, ынчангаш үр чурттаар мен. Сээң хүннериң санныг арткан».
Хып турар лаа эжинге харыылаан: «Бодумну бичии-даа хараадавайн тур мен. Мээң чуртталгам кайгамчык болгаш долу уткалыг. Мээң чулам одундан дыка хөй өске лаалар оттарын кыпсып ап турар, ол дээш мээң одум бичии-даа эвээжевес. Бодумнуң чырыым-биле байырлал шивизинге чаштың караан өөртүр мен, аарыг кижини долгандыр багай агаарны дириг одум-биле арыглап кааптар мен, ыдыктыг өргүлдер үезинде чүдүкчүлерге күштү берип турар мен. Кай, мээң кыска чуртталгам кайгамчык эвес-тир бе?! Сени, кывыспаан лааны, харын хараадаар-дыр мен, салым-хууң кээргенчиг-дир. Бодуңнуң хүлээлгеңни күүсетпээн ышкажыл сен, сорук киирер одуң кайыл? Шак-ла мынчаар дыка үр чылдар ишти чыткаш, кымга өөрүшкү, ажык-дуза көргүзер сен?
Ылап-ла, ноюрзап чыдар орнунга, хыпканы дээре, чүге дизе кывары — амыдырал, ижээри — өлүм-дүр. Төндүр хыпкаш, амыдыралы туруптар деп мени кээргеп туруңда, шимчээшкин чок чуртталгаң безин эгелевейн чыткаш, өлүп каар ышкажыл. А амыдырал чаның-биле эрте бээр».
Ийи лааның чугаазы ындыг болган.
Чурукту интернеттен хоолгалаан.
“Шын” №29 2025 чылдың июль 31