Тывада 2761 уруг коронавирус хамчыынга удур вакцинацияның бүрүн курузун эрткен, 6407 уруг вакцинаның бирги компонентизин алган.
Уругларга ГамКовид-М биле «Спутник-М» вакциналарның беш катап эвээжеткен хемчээлин салып турар дээрзин сагындыраал. Тарылга эрткен уруглар чүгле боттары эвес, оларны долгандыр турар айыылдыг бөлүкке хамааржыр кырган-авалары болгаш кырган-ачалары камгалалдыг болур дээрзин Республиканың уруглар эмнелгезиниң улуг эмчизиниң оралакчызы Алла Куулар медеглээн.
Тывада ниитизи-биле коронавирус хамчыындан 3533 уруг аараан. Хамчыктыг вирус өскерлир шинектиг деп, Алла Куулар дыңнаткан: «COVID-19 уругга чиик хевирге эртер деп бодаары улуг частырыг-дыр. Хамчык аарыгның эгезинде улуг назылыг болгаш айыылдыг бөлүктүң кижилеринге деңнеп, чаа коронавирус «уругларны хайыралаар» деп чугаалажып турган бис. Оон бээр вирус каш-даа катап өскерилген, аарыгның аар хевирин эртип турар уруглар саны көвүдээн».
Бистиң корр.