Чоннуң чаңгыс деминиң хүнүнүң бүдүүзүнде Кызылдың транспорт техникуму биле Луганск Улус Республиканың Червонопартизанск колледжизиниң сургуулдарының аразынга телекөвүрүг болган.
Чоннарның деми болгаш найыралы – ук хемчегниң кол темазы болган.
ТР-ниң өөредилге сайыдының хүлээлгезин күүседип турар Ренат Ооржак телекөвүрүгнүң киржикчилеринге байырын чедиргеш: «Аңгы-аңгы чоннар шак-ла мындыг форматка харылзажып турары өөрүнчүг-дүр. Бистиң ажы-төлүвүс ырактан-даа болза, бот-боттарын деткижип турары дээрге-ле демниг чоруувусту көргүзүп турары-дыр» — деп чугаалаан.
Регион бүрүзүнүң сургуулдары илеткелдерин, Төрээн чуртунуң база өөренип турар чериниң дугайында видеороликтерни белеткеп алганнар.
Уруглар бот-боттарын эки билчип алыры-биле «Ажык микрофонну» эрттирген. Аңаа бот-боттарынга сонуургаан айтырыгларын салчып, студент өөредилге, амыдыралын база янзы-бүрү хемчеглер дугайында сайгарып чугаалашканнар. Түңнелинде ийи регионнуң киржикчилери моон-даа соңгаар телекөвүрүгнү уламчылаар кылдыр дугурушканнар.
«Шак-ла мындыг «Телекөвүрүг» ышкаш хемчеглер ортумак өөредилге черлериниң сургуулдарының аразынга найыралын быжыктырар, улуг чуртувустуң ырак регионнарының дугайында хөй чүүлдү билип алыр эки арганы берип турар. Мындыг өөредилгелиг төлевилелдер националдар аразының кады ажылдажылгазын сайзырадырынга, аңгы-аңгы регионнарның аныяктарының аразынга найыралды болгаш бот-боттарын эки билчип алырынга дузалаар» — деп, ТР-ниң Өөредилге яамызының профкилдизиниң начальниги Олимпия Ондар чугаалаан.
ТР-ниң Өөредилге яамызының медээлеринден.
“Шын” №85 2024 чылдың ноябрь 6