Тыва Республикада күрүнениң күш-ажыл инспекциязы чамдык ажыл берикчилериниң шөлээ графигинге хамаарыштыр дүрүмнерни хажытканын илереткен дугайында инспекцияның удуртукчузу Эдуард Доржу дыңнаткан.
«Ажыл берикчизи кижи ажылдакчыларының шөлээлээр графигин бадылаар хүлээлгелиг. Чаа чыл үнүп кээрге-ле, ийи неделя дургузунда бадылаан турар ужурлуг. Графикче организацияда албан-езузу-биле ажылдап турар хамааты бүрүзү кирер. Оон аңгыда, ырактан ажылдап турар ажылдакчылар база шөлээ графигинче кирер» — деп, Эдуард Доржу демдеглээн.
Шөлээ графиги тургузуп тургаш, ажылдакчыларының күзелдерин база барымдаалаар. Ийи тала шөлээ графигинге чөпшээрээн турар ужурлуг. Шөлээни ийи үзер дугайында шиитпирни чүгле ажылдакчының чөпшээрели-биле үндүрүп болур. Бир эвес эрткен чылын чедир дыштанмаан хонуктары бар болза, ол хүннерни дараазында чылче чылдырбайн, төндүр дыштаныры чугула. Шөлээ графиги тургузуп тургаш, Т-7 деп чаңгыс аай форманы ажыглаар болза эки. Шөлээ графиги ажыл берикчизинге-даа, ажылдакчыга-даа чугула херек документ дээрзин Эдуард Доржу демдеглээн.
Күрүнениң күш-ажыл инспекциязының дыңнатканы-биле белеткээн.
Чурукту интернет
четкизинден хоолгалаан.
“Шын” №14 2025 чылдың апрель 17